ރައީސް މައުމޫނާއި, ޤާސިމްގެ ލޭ ހުއްދަވާނެކަމަށް ތަސްލީމް ބުނި: ހެކި
ކުރީގެ ރައީސް މައުމޫން ޢަބްދުލްޤައްޔޫމާއި ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހިމްގެ ލޭ ހުއްދަވާނެކަމަށް ހއ.ހޯރަފުށި, އަލަނާސިގޭ މުޙައްމަދު ތަސްލީމު ބުނެފައިވާކަމަށް ކްރިމިނަލް ކޯޓުގައި މިއަދު ބޭއްވި ޝަރީޢަތުގެ މަޖިލީހުގައި ސިއްރު ހެކިވެރިއަކު ހެކިބަސްދީފިއެވެ.
ރައްޔިތުން މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއާ ގުޅިގެން ހިންގި ތަޙްޤީޤުތަކަށްފަހު ތަސްލީމުގެ މައްޗަށް ވަނީ ޓެރަރިސްޓު ޖަމާޢަތަކަށް ތާއީދުކުރުމުގެ ކުށުގެ ދަޢުވާ އުފުލައިފައެވެ.
ފުލުހުން މީގެކުރިން ބުނި ގޮތުގައި ތަސްލީމަކީ ރައީސް ނަޝީދަށް ހަމަލާ ދިނުމުގައި ޢަމަލީ ގޮތުން ހަރަކާތްތެރިވި މީހުންނަށް ވިސްނުވައިދިން މީހެކެވެ. އަދި އޭނާއަކީ ރައީސް ނަޝީދަކީ ދީނުން ބޭރުވެ މުރުތައްދުވެފައިވާ މީހެއްކަމަށް ކަނޑައަޅައި, ނަޝީދު މަރައިލަންޖެހޭކަމަށް ވަކާލާތުކޮށް ހެދި މީހެއް ކަމަށް ވެސް ފުލުހުން ބުނެފައިވެއެވެ.
ތަސްލީމަށް އުފުލާފައިވާ ދަޢުވާގެ މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމުގެ މަރުހަލާއެވެ. މިއަދު ބޭއްވި އަޑުއެހުމުގައި ދެ ހެކިވެރިއަކު ވަނީ އެ މީހުންނަކީ ކޮންބައެއްކަން ނޭނގޭ ގޮތަށް އަޑު ބަދަލު ކޮށްގެން ހެކިބަސްދީފައެވެ.
ފުރަތަމަ ހެކިވެރިޔާ ބުނީ ތަސްލީމާ ދިމާވީ ބައްދަލުވުމެއްގެ ތެރެއިން ކަމަށެވެ. ތަސްލީމަކީ މީސްމީޑިއާގައި ހަރުކަށި ފިކުރު ފަތުރަމުންދިޔަ މީހެއްކަމަށް ވެސް ހެކިވެރިޔާ ބުންޏެވެ. އަދި ރައީސް ނަޝީދުގެ އިތުރުން މައުމޫނާއި ޤާސިމްގެ ލޭ ހުއްދަވާނެކަމަށް ތަސްލީމު ބުނެފައިވާކަމަށް ވެސް ހެކިވެރިޔާ ބުނެފައިވެއެވެ.
އޭގެ އިތުރުން ހަނގުރާމަވެރި ޖަމާޢާތެއްކަމަށްވާ ''އައިއެސް'' އަކީ ސައްހަ ޚިލާފަތެއްކަން މީހުންނަށް ވިސްނައިދޭން ތަސްލީމު މަސައްކަތްކޮށްފައިވާ ކަމަށް ވެސް ހެކިވެރިޔާ ބުނެފައިވެއެވެ.
ދެވަނަ ހެކިވެރިޔާ މައިގަނޑު ގޮތެއްގައި ދެއްކީ ތަސްލީމު ހަރުކަށި ފިކުރު ޕްރޮމޯޓްކުރާ ވާހަކައާއި ތަސްލީމު އައިއެސްއަށް ތާއީދު ކުރާ ވާހަކައެވެ.
