އިންޑިއާގައި ބަހެއް ކޯރަކަށް ވެއްޓި، 26 މީހަކު މަރުވެއްޖެ
އިންޑިޔާގެ އުތުރުގައިވާ އުއްތަރް ޕްރެދޭޝް ސްޓޭޓުގެ ރަށެއް ކަމުގައިވާ ކާންޕޫރުގައި ޓްރެކްޓަރެއްގެ ފަހަތުގައި ޖަހައިގެން ދުއްވަމުން ދިޔަ އުޅަނދެއް ފުރޮޅައިލާ ފެންގަނޑަކަށް ވެއްޓި އޭގައި ދަތުރު ކުރަމުންދިޔަ 26 މީހުން މަރުވެއްޖެއެވެ.
ގިނަ އަދަދެއްގެ ބަޔަކު އަރުވައިގެން ދުއްވަމުން ދިޔަ އުޅަނދު ފެންގަނޑަށް ވެއްޓުނު ހާދިސާގައި އިތުރު 16 މީހަކު ޒަޚަމުވިއެވެ.
މި ހާދިސާ ހިނގި ވަގުތު އުޅަނދުގައި 50 މީހުން ދަތުރުކުރަމުން ދިޔަ ކަމަށާއި، އޭގެ ތެރޭގައި ގިނައީ އަންހެނުންނާއި ކުޑަކުދިން ކަމުގައި ކާންޕޫރުގެ އޮފިޝަލަކު ބުންޏެވެ. ޓްރެކްޓަރު ފަދަ ތަކެތީގެ ފަހަތުގައި ޖަހައިގެން މި ފަދަ އުޅަނދު ދުއްވުމަކީ އިންޑިޔާގައި ޢާންމު ކަމެކެވެ. ނަމަވެސް، އެއީ ޤަވާޢިދާ ޚިލާފަށް ކުރާ ކަމެކެވެ. މި ހާދިސާއާ ގުޅިގެން އިންޑިޔާގެ ބޮޑުވަޒީރު ނަރެންދުރަ މޯދީ ވަނީ މަރުވި މީހުންގެ ޢާއިލާތަކަށް ތަޢުޒިޔާ ވިދާޅުވެފައެވެ. އުއްތަރް ޕްރެދޭޝްގެ ޗީފް މިނިސްޓަރު ޔޯގީ އަދިތްޔަނާތް ވިދާޅުވީ އެ ފަދަ އުޅަނދުތައް ބޭނުން ކުރަން ޖެހޭނީ މުދާ އުފުލުމަށް އެކަނި ކަމުގައެވެ.
މަގުމަތީގައި ނުރައްކާތެރި އެކްސިޑެންޓުތައް ހިނގުމަކީ އިންޑިޔާގައި ޢާންމުވެފައިވާ ކަމެކެވެ. އަދި، މި ފަދަ ހާދިސާތަކުގައި ގިނަ އަދަދެއްގެ ފުރާނަ ގެއްލިފައިވެއެވެ. މިދިޔަ އަހަރު އެކަނިވެސް މަގުމަތީގެ އެކްސިޑެންޓުތަކުގައި މަރުވި މީހުންގެ އަދަދު 150,000 އަށްވުރެ މައްޗަށް އަރައެވެ. އެއީ، އެވުރެޖުކޮށް ދުވާލެއްގެ މައްޗަށް 400 އެއްހާ މަރެވެ.
