ރައީސް ޞާލިޙް މިރޭ ޤައުމާ މުހާތަބްކުރައްވާނެ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު މިރޭ ޤައުމާއި މުހާތަބްކުރައްވާ ވާހަކަފުޅުދައްކަވާނެއެވެ.
ރައީސް ޞާލިޙް ޤައުމާއި މުހާތަބްކުރައްވާނީ މި އަހަރުގެ ޤައުމީ އިނާމު ދެއްވުމަށް މިރޭ 8:30 ދަރުބާރުގޭގައި ބާއްވާ ހާއްސަ ރަސްމިއްޔާތުގައެވެ.
މި ޖަލްސާގައި މިއަހަރު ޝަރަފުވެރިކަމުގެ ޤައުމީ އިނާމު ލިބިވަޑައިގަންނަވާ 10 ބޭފުޅުންނާއި، ހިތްވަރު ދިނުމުގެ ޤައުމީ އިނާމު ލިބިވަޑައިގަންނަވާ 19 ބޭފުޅުންނާއި 3 ފަރާތަކަށް އެވޯޑް ދެއްވުމަށް ވަނީ ނިންމަވާފައެވެ.
މި އިނާމަކީ، ދިވެހި ޤައުމާއި ދިވެހި މުޖުތަމަޢުގެ ހެވާއި ލާބައަށްޓަކައި ވަކިވަކި ފަރުދުންނާއި، މިނިވަން މުއައްސަސާތަކުންނާއި، މަދަނީ އެކިއެކި ޖަމްޢިއްޔާ، ޖަމާޢަތްތަކުންނާއި، ވިޔަފާރި އިދާރާތަކުން ކުރާ މަސައްކަތްތަކުގެ އަގު ވަޒަންކޮށް ދޭ އިނާމެކެވެ.
ގައުމީ އިނާމަކީ ދިވެހި ޤައުމުގެ ތަރައްޤީއަށްޓަކައި އެކި ފަރާތްތަކުން ކުރަމުންގެންދާ މަސައްކަތްތަކުގައި، އެ ފަރާތްތަކުން ހޯދާ ކުރިއެރުންތައް ބަލައިގަނެ، އެކަންކަމުގެ އަގު ވަޒަންކުރުމާއި ހިތްވަރުދިނުމުގެ މަޤްޞަދުގައި ކޮންމެ އަހަރަކު ދެއްވަމުން ގެންދަވާ އިނާމެކެވެ.
