ޚާއްސައެހީއަށް ބޭނުންވާ އަންހެން ކުއްޖަކާ ބެހުނު ޅިޔަނު 18 އަހަރަށް ޖަލަށް
މެދު ރާއްޖެތެރޭގެ ރަށެއްގައި ޚާއްސައެހީއަށް ބޭނުންވާ އަންހެން ކުއްޖަކާ ބެހުނު މީހަކު 18 އަހަރު ދުވަހަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ޖަލަށްލުމަށް ޙުކުމްކޮށްފައިވަނީ ޖިންސީ އަނިޔާގެ ޝިކާރައަކަށްވި 14 އަހަރުގެ ކުއްޖާގެ ޅިޔަނެވެ.
2020 ވަނަ އަހަރުގެ ފުރަތަމަކޮޅު ތިން ދުވަހެއްގެ މަތިން އެ މީހާ އެ އަންހެން ކުއްޖާ ރޭޕްކުރީ އޭނާގެ ގޯއްޗެއްގައި ހަދާފައި ހުރި ކޮޓަރިއަކަށް ކުއްޖާ ގެންގޮސްގެންނެވެ. އޭގެ އިތުރުން އެ ކުއްޖާގެ ޢާއިލީ ގޭގެ ކޮޓަރިތެރޭގައި ވެސް ވަނީ ޖިންސީ ގޯނާކޮށްފައެވެ.
އަންހެން ކުއްޖާ މާބަނޑުވިކަން އެނގުނީ މައްސަރުކަންތައް ނުޖެހި ދެތިން މަސްވުމުން ޑޮކްޓަރަށް ދެއްކުމުންނެވެ. އެ ގޮތުން ޓެސްޓް ހަދައި ބެލިއިރު ކުއްޖާގެ ބަނޑަށް ތިން މަހެވެ.
މި މައްސަލައިގައި ޢުމުރުން 37 އަހަރުގެ ފިރިހެން މީހާގެ މައްޗަށް ދައުލަތުން އުފުލީ އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލެއް ހިންގުމުގެ ކުށުގެ ދަޢުވާއެވެ.
ދައުލަތުން ހުށަހެޅި ހެކިތަކުން ކުށް ސާބިތުވާތީ ކްރިމިނަލް ކޯޓުން އިއްޔެ ޙުކުމްކުރީ 18 އަހަރު ދުވަހަށް އޭނާ ޖަލަށްލުމަށެވެ. ނަމަވެސް މައްސަލާގައި އޭނާ ބަންދުގައި ހުރި މުއްދަތު އުނިކުރުމުން މިހާރު ތަންފީޒުކުރަންޖެހޭނީ 15 އަހަރާއި 08 މަހާއި 11 ދުވަހެވެ.
Ads by STO
