އިންޑިއާއަށް ދުރަށް ދިއުމުގެ ވިސްނުމެއް ޝިއޯމީގެ ނެތް
ޗައިނާގެ ސްމާޓްފޯން ކުންފުނި ޝިއޯމީ އިން އިންޑިއާއިން އަޅާފައިވާ ފިއްތުންތަކާއިއެކު ވެސް، އެ ކުންފުނީގެ އޮޕަރޭޝަންތައް ކުރިއަށް ގެންދާނެ ކަމަށް ބެލެވޭ ކަމަށް މީޑިއާ ރިޕޯޓްތައް ބުނަން ފަށައިފިއެވެ.
މާކެޓުން ވަކިވެދާނެ ކަމަށް ދާދި ފަހުން އަޑުފެތުރިފައިވީ ނަމަވެސް، އެ ކުންފުނީގެ އޮޕަރޭޝަންތައް އިންޑިއާގައި ކުރިއަށް ގެންދާނެ ކަމަށް އެނަލިސްޓުން ބުނެއެވެ. ޝިއޯމީގެ ފޯނު ޗައިނާގައި ވިއްކާ މިންވަރު ވަނީ ދަށަށް ގޮސްފައވެެ
އިންޑިއާގެ ހުޅަނގު ދެކުނުގައި ހުންނަ ކަރްނާޓަކާގެ ހައި ކޯޓުން މި މަހުގެ ކުރީކޮޅު ވަނީ އެ ކުންފުނީގެ 676 މިލިއަން ޑޮލަރުގެ މުދާ ހިފެހެއްޓުމަށް ކޯޓުން ނެރުނު އަމުރަކުން ވަގުތީ ލުޔެއް ހޯދުމަށް އެ ކުންފުނިން ހުށަހެޅި އިސްތިއުނާފު ބާތިލްކޮށްފައެވެ.
އިންޑިއާގެ ފެޑެރަލް ފައިނޭންޝަލް ކްރައިމް އެޖެންސީން މިދިޔަ އޭޕްރީލް މަހު އެ މުދާތައް ފްރީޒްކުރީ ރޯޔަލްޓީ ޕޭމަންޓްގެ ސިފައިގައި ޝިއޯމީ އިން ގަވައިދާ ހިލާފަށް ފައިސާ ފޮނުވި ކަމަށް ބުނެއެވެ. އެ ކުންފުނިން ވަނީ އެއްވެސް ގޯހެއް ހަދާފައި ނުވާ ކަމަށާއި އެމެރިކާގެ ޓެކް ކުންފުންޏެއް ކަމަށްވާ ކުއަލްކޮމް އަށް ދެއްކި ފައިސާއަކީ ސައްހަ ފައިސާތަކެއް ކަމަށް ބުނެފައެވެ.
ގާނޫނީ ގޮންޖެހުންތަކާ އެކުވެސް، ޝާއޯމީ އިން ވަނީ އެ ކުންފުނީގެ އޮޕަރޭޝަންތައް އިންޑިއާއިން ޕާކިސްތާނަށް ބަދަލުކޮށްފާނެ ކަމަށް ދެކެވޭ ވާހަކަތައް ވަރަށް އަވަހަށް ދޮގުކޮށްފައެވެ. އޮކްޓޯބަރު މަހުގެ 7 ވަނަ ދުވަހު އެ ކުންފުނިން ކުރި ޓުވީޓެއްގައި ބުނެފައިވަނީ މިފަދަ ތުހުމަތުތަކަކީ މުޅިން ދޮގު އަދި އެއްވެސް އަސާސެއް ނެތް ތުހުމަތުތަކެއް ކަމަށާއި އަދި "މޭޑް އިން އިންޑިއާ" ވައުދު ގެއްލުވާނުލާނެ ކަމަށެވެ.
ސްޓްރެޓެޖީ އެނަލިޓިކްސްގެ ސީނިއާ އެނަލިސްޓެއް ކަމަށްވާ ރާޖީވް ނާޔަރު ވިދާޅުވި ގޮތުގައި އެ ކުންފުނީގެ މަދުވެގެން ހަ ފެކްޓްރީ އެއް އޮންނަ އިންޑިއާގައި އުފެއްދުންތެރިކަމަށް ވަރަށް ބޮޑަށް އިންވެސްޓް ކުރެއެވެ. އަދި ޗައިނާގެ ކުންފުންޏަކީ އިންޑިއާގެ މާކެޓުގައި މިޑް އަދި އެންޓްރީ ލެވެލްގެ މޮބައިލް ފޯނުތަކުގެ "ވަރުގަދަ ޕޯޓްފޯލިއޯއެއް" ވެސް އޮންނަ ކުންފުންޏަކަށް ވާއިރު، އެ ފޯނުތަކަށް ފަސޭހައިން ދޫނުކުރެވޭނެ ކަމަށް އޭނާ ވިދާޅުވިއެވެ.
ދެވަނަ ކުއާޓަރުގައި ދުނިޔޭގެ ދެވަނައަށް އެންމެ ބޮޑު ސްމާޓްފޯން މާކެޓުގައި 7.1 މިލިއަނަށްވުރެ ގިނަ ފޯނު ޝިއޯމީ އިން ވިއްކާފައިވެއެވެ. އެއީ މި އަހަރު ދެވަނަ ކުއާޓާގައިވިއްކި ފޯނުތަކުގެ 20 އިންސައްތައެވެ.
