ސަރުކާރުން ބޭނުންވި ގޮތަށް ޓެކްސް ބޮޑުކުރަން ކޮމިޓީން ފާސްކޮށްފި

އަންނަ ޖަނަވަރީން ފެށިގެން ޖީއެސްޓީއާއި ޓީޖީއެސްޓީ ބޮޑުކުރަން ރައްޔިތުން މަޖިލީހުގެ މުޅި ކޮމިޓީން މިއަދު ފާސްކޮށްފިއެވެ.

Ads by STELCO

ސަރުކާރުން ހުށަހަޅާފައިވަނީ އަންނަ ޖަނަވަރީން ފެށިގެން ޖީއެސްޓީ %6 އިން %8 އަށް އަދި ޓީޖީއެސްޓީ %8 އިން %16 އަށް ބޮޑު ކުރުމަށެވެ.

ބިލު އެ ގޮތަށް ފާސްކުރީ ބައެއް މެންބަރުން ބިލަށް ހުށަހެޅުއްވި އިސްލާހުތައް ބޭރުކޮށްލުމަށްފަހުއެވެ.

ބިލު އެ ގޮތަށް ފާސްކުރުމުގެ ކުރިން ނައިފަރު ދާއިރާގެ މެންބަރު އަޙްމަދު ޝިޔާމް ހުށަހެޅުއްވީ މިހާރު ހުރި ރޭޓުތަކުގައި ޓެކްސްތައް ނެގުމަށެވެ. އެކަމަކު އެ ހުށަހެޅުން ބޭރުކޮށްލީ 56 މެންބަރުންގެ ވޯޓާއެކުއެވެ.

އޭގެފަހުން މެދުހެންވޭރު ދާއިރާގެ މެންބަރު ޢަލީ އާޒިމް ހުށަހެޅުއްވީ ޓީޖީއެސްޓީގެ ގޮތުގައި %16 ގެ ބަދަލުގައި %14 ނެގުމަށެވެ. ނަމަވެސް 46 މެންބަރުން އެއާ ދެކޮޅަށް ވޯޓު ދެއްވުމާއެކު އެ ހުށަހެޅުން ވެސް ފާހެއްނުވިއެވެ. ދެން އާޒިމް ހުށަހެޅުއްވީ ގެސްޓު ހައުސްްތަކުން ނަގާ ޓީޖީއެސްޓީގެ ޢަދަދު އިތުރު ނުކުރުމަށެވެ. ނަމަވެސް 44 މެންބަރުންގެ ވޯޓާއެކު އެ ހުށަހެޅުން ވެސް ވަނީ ބޭރުކޮށްލައިފައެވެ.

މީގެ އިތުރުން ޓެކްސް ޤާނޫނަށް އަމަލުކުރަން ފަށާ ތާރީޚަކީ 2023 ވަނަ އަހަރުގެ އޭޕްރީލްކަމުގައި ހެދުމަށް އާޒިމް ހުށަހެޅުއްވި އިސްލާހު ވެސް ވަނީ 45 މެންބަރުންގެ ވޯޓާއެކު ބޭރުކޮށްލައިފައެވެ.

އިސްލާހުތައް ބޭރުކޮށްލުމަށްފަހު, ސަރުކާރުން ފޮނުވި ގޮތަށް ބިލު ފާސްކުރަން ރިޔާސަތުން ވޯޓަށް އެހުމުން އެކަމަށް ތާއީދުކުރައްވައި 50 މެންބަރުން ވޯޓު ދެއްވިއެވެ. ނުފެންނަކަމަށް ވޯޓު ދެއްވީ 19 މެންބަރުންނެވެ.