12 އަހަރުގެ ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި އިންޑިއާ މީހަކު ހައްޔަރުކޮށްފި
ރާއްޖޭގެ ދެކުނުގެ އަތޮޅުގެ ރަށެއްގައި 12 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި އިންޑިއާ މީހަކު ހައްޔަރުކޮށްފިއެވެ.
ފުލުހުންގެ މުއައްސަސާއިން ހާމަކުރެއްވި ގޮތުގައި ސައުތު ޕޮލިސް ރީޖަންގައި (ގއ, ގދ, ޏ, ސ) ހިމެނޭ ރަށެއްގައި 12 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމަށް ތުހުމަތު ކުރެވޭ މައްސަލައެއް ފުލުހުންނަށް ރިޕޯޓްކޮށްފައިވަނީ މިދިޔަ ހަފުތާގެ ބުދަ ދުވަހުއެވެ.
ފުލުހުން މިއަދު ވިދާޅުވީ އެ މައްސަލައާ ގުޅިގެން ކޯޓު ޢަމުރެއްގެ ދަށުން އިއްޔެ 21 އަހަރުގެ ފިިރިހެނަކު ހައްޔަރުކޮށްފައިވާ ކަމަށެވެ. އޭނާއަކީ އިންޑިއާއަށް ނިސްބަތްވާ މީހެއްކަމަށް ފުލުހުން ވިދާޅުވިއެވެ.
އެ މައްސަލަ ތަޙްޤީޤު ކުރަމުންދާ ކަމަށް ވެސް ފުލުހުން ވިދާޅުވިއެވެ.
ރާއްޖޭގައި ޖިންސީ ގޯނާގެ މައްސަލަތައް އިތުރުވެފައިވާއިރު އެފަދަ ބައެއް މައްސަލަތަކުގައި ބިދޭސީން ބައިވެރިވެފައިވާކަމަށް ފުލުހުންގެ ރެކޯޑްތަކުން ދައްކައެވެ. ނަމަވެސް އެއިން ގިނަ މީހުންނަށް އެއްވެސް ފިޔަވަޅެއް ނާޅައި އަނބުރާ ޤައުމަށް ފޮނުވައިލާތީ ސަރުކާރަށް ފާޑކިޔުން ވެސް އަމާޒުވެއެވެ.
