ކުޑަކުއްޖަކާއެކު ޖިންސީ ޢަމަލެއް ހިންގި މީހަކު 15 އަހަރަށް ޖަލަށްލުމަށް ޙުކުމްކޮށްފި
ކުޑަކުއްޖަކާއެކު ޖިންސީ ޢަމަލެއް ހިންގި މީހަކު 15 އަހަރަށް ޖަލަށްލުމަށް ކްރިމިނަލް ކޯޓުން އިއްޔެ ޙުކުމްކޮށްފިއެވެ.
މި މައްސަލައިގައި ދަޢުވާ އުފުލީ އދ.ދިއްދޫ ރޯޝަނީ ވިލާ ޝާމިލް އާދަމްގެ މައްޗަށެވެ. އޭނާގެ މައްޗަށް އުފުލީ ޖިންސީ އަމަލެއް ހިންގުމުގެ ކުށުގެ ދަޢުވާއެވެ.
އެ ދަޢުވާއަށް އޭނާ އިންކާރު ކުރި ނަމަވެސް ކްރިމިނަލް ކޯޓުން އިއްޔެ ވަނީ އޭނާގެ މައްޗަށް ކުށް ސާބިތުވާކަމަށް ކަނޑައަޅައިފައެވެ.
ކްރިމިނަލް ކޯޓުން ބުނީ މައްސަލަ ސާބިތު ކުރުމަށް ދަޢުލަތުން ހުށަހެޅި ހެއްކާއި ޤަރީނާއަށް ބަލާއިރު, ޝައްކެއް ނެތް މިންވަރަށް އޭނާގެ މައްޗަށް ކުށް ސާބިތުވާ ކަމަށެވެ. އެ ގޮތުން އޭނާ 15 އަހަރު ދުވަހުގެ މުއްދަތަށް ޖަލަށްލުމަށް ޙުކުމް ކުރާ ކަމަށެވެ.
ނަމަވެސް މި މައްސަލައިގެ ތަޙްޤީޤު މަރުހަލާއާއި ޝަރީޢަތުގެ މަރުހަލާގައި ޝާމިލް ތިން އަހަރާއި 13 ދުވަސް ހޭދަކޮށްފައިވާތީ އޭނާ ދެން ތަންފީޒުކުރަންޖެހޭނީ 11 އަހަރާއި އަށް މަހާއި 17 ދުވަހުގެ ޖަލު ޙުކުމެކެވެ.
