މާލޭގައި 18 ކެމިކަލް ގުދަން ހުރިކަމަށް ބުނާ ވާހަކައަކީ ދޮގެއް: އެޗްޑީސީ
ތިލަފުއްޓަށް ބަދަލުނުކޮށް 18 ކެމިކަލް ވެއާ ހައުސް މާލޭގައި ހުރިކަމަށް ބުނެ ފަތުރަނީ އެއްވެސް އަސާސެއް ނެތް ދޮގު މައުލޫމާތު ކަމަށް ހައުސިންގ ޑިވެލޮޕްމަންޓް ކޯޕަރޭޝަން, އެޗްޑީސީން ވިދާޅުވެއްޖެއެވެ.
އެޗްޑީސީން މިއަދު ނެރުނު ބަޔާނެއްގައި ވިދާޅުވީ މާލޭގައި މިވަގުތު 18 ކެމިކަލް ވެއާރ ހައުސްއެއް ހުރިކަމަށް ބުނެ ލިޔެފައިވާ ހަބަރަކީ އެއްވެސް ސައްޙަ މަޢޫލޫމާތަކަށް ބިނާކޮށް ގެނެސްދީފައިވާ ހަބަރެއް ނޫން ކަމަށެވެ.
މިވަގުތު ތިލަފުށީގައި 34 ކެމިކަލް ވެއަރ ހައުސްއެއް ޤާއިމު ކުރެވިފައިވާ ވާހަކަ އާއި އިތުރު 18 ވެއާރ ހައުސްއެއް ޤާއިމު ކުރުމުގެ މަސައްކަތް ކުރެވެމުންދާ ކަމަށް މަޢޫލޫމާތު ދެވިފައިވާ ކަމަށް އެ ބަޔާނުގައި ވިދާޅުވެފައިވެއެވެ.
“ އެއްވެސް ހާލަތެއްގައި މި ވެއާރ ހައުސްތަކަކީ މިވަގުތު މާލޭގައި ހުރި ތަންތަން ބަދުލު ކުރުމަށް ކުރެވޭ މަސައްކަތެއް ކަމުގައި މަޢޫލޫމާތު ދީފައި ނުވާނެ ކަމުގައި ދަންނަވަން” އެޗްޑީސީން ވިދާޅުވިއެވެ.
އެޗްޑީސީން އިތުރަށް ވިދާޅުވީ މިފަދަ ދަނޑިވަޅެއްގައި އާންމުންގެ މެދުގައި ބިރުވެރިކަން އުފެދޭ ގޮތަށް ޒިންމާދާރުކަން ކުޑަ ގޮތަށް ހަބަރު ފެތުރުމަކީ ހިތާމަ ކުރާ ކަމެއް ކަމަށެވެ.
އެޗްޑީސީން މިފަދައިން ވިދާޅުވެފައިވާއިރު ރޭ އަލިފާނުގެ ހާދިސާ ހިނގި ސަރަހައްދަށް ރައީސް އިބްރާހިމް މުޙައްމަދު ޞާލިޙް މިއަދު ހެނދުނުގެ ވަގުތެއްގައި ވަޑައިގެންފައިވެއެވެ. އަދި އެ ސަރަހައްދުން ނޫސްވެރިންނާ ވާހަކަ ދައްކަވަމުން، މާލޭގައި އެއްވެސް ކެމިކަލް ގުދަނެއް މިހާރު ނުހުންނާނެ ކަމަށާއި އެފަދަ ހުރިހާ ތަނެއް ތިލަފުއްޓަށް ބަދަލުކޮށްފައިވާނެ ކަމަށް ވިދާޅުވެފައިވެއެވެ.
Ads by STO
