އައްޑޫގެ ގިނަ ތަންތަނުގައި "އިންޑިއާ އައުޓް" ޖަހައިފި
އައްޑޫގައި ހުންނަ ކުރީގެ ރައީސް މުޙައްމަދު ނަޝީދުގެ އޮފީހުގެ ބޭރުގައި، "އިންޑިއާ އައުޓް" ޖަހައިފިއެވެ.
"އިންޑިއާ އައުޓް" ކެންޕެއިނަކީ ރާއްޖޭގައި ތިބި އިންޑިއާ ސިފައިން ބޭލުމަށް އިދިކޮޅު ފަރާތްތަކުން ކުރަމުން އަންނަ ކެންޕެއިނެކެވެ. އެ ކެމްޕޭނަކީ ގައުމީ ސަލާމަތަށް ނުރައްކަލެއް ކަމަށް ކަނޑައަޅައި ރައީސް ޞާލިޙް ވަނީ ޤަރާރަކުން އެކަން މަނާކުރައްވާފައެވެ. އެއާއެކު ކެންޕެއިން މަޑު ޖައްސާލި ކަމަށް ކެންޕެއިންގައި އިސްކޮށް އުޅުއްވާ އިދިކޮޅު ލީޑަރު ރައީސް ޔާމީން ވަނީ ވިދާޅުވެފައެވެ.
ނަޝީދުގެ އޮފީހުގެ އިތުރުން އައްޑޫ މޭޔަރު އަލީ ނިޒާރުގެ ގެއާއި ސިޓީ ކައުންސިލް އިދާރާގެ ބޭރު ފާރުގައި ވެސް އިންޑިއާ އައުޓް ވަނީ ޖަހާފައެވެ.
ރައީސް ޔާމީން ވަނީ މިފަހުން އައްޑުއަށް ދަތުރުފުޅެއް ކުރައްވާފައެވެ. އެދަތުރުފުޅު ނިންމަވާލެއްވުމަށްފަހު ރައީސް ޔާމީން މާލެ ވަޑައިގެންފައިވަނީ ރޭގެ ވަގުތެއްގައެވެ.
މިދަތުރުގައި ހިތަދޫގައި ބޭއްވި ޖަލްސާއެއްގައި ރައީސް ޔާމީންވަނީ އައްޑޫގެ ހުރިހާ ގައެއްގައި އިންޑިއާ އައުޓް ޖަހައިފިނަމަ ފުލުހުން އުޅެން ޖެހޭނީ ވަރަށް ހާލުގައި ކަަމަށް ވިދާޅުވެފައެވެ.
އައްޑޫގެ އެކިތަންތަނުގައި އިންޑިއާ އައުޓް ޖެހި މައްސަލަ ފުލުހުން މިހާރު އަންނަނީ ބަލަމުންނެވެ.
