ޝުޖާޢު ނަޝީދު ފެކްޝަނަށް: ވަގަށް ގޮވާފައިވެސް ބަޖެޓަށް ވޯޓު ދޭނެ
އެމްޑީޕީގެ މެންބަރުން އެއްބަޔަކު އަނެއްބަޔަކަށް ވަގަށް ގޮވާފައިވެސް އަންނަ އަހަރަށް ލަފާ ކުރާ ބަޖެޓު ފާސްކުރަން ވޯޓު ދޭނެ ކަމަށް ޕީއެންސީގެ ނައިބު ރައީސް އަދި ހުޅުމާލެ ދާއިރާގެ ކައުންސިލަރު އިބްރަހީމް ޝުޖާޢު ވިދާޅުވެއްޖެއެވެ.
އަންނަ އަހަރަށް ލަފާކޮށް މަޖިލީހަށް ހުށައަޅާފައިވަނީ 42.6 ބިލިއަން ރުފިޔާގެ ބަޖެޓެކެވެ. ރައްޔިތުންގެ މަޖިލީހުގައި، މި ބަޖެޓަށް ބަހުސް ކުރިއިރު، އެމްޑީޕީގެ ރައީސް މުޙައްމަދު ނަޝީދުގެ ފެކްޝަނުން ގެންދަވަނީ ބަހުސްގެ ތެރެއިން ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
މިކަމަށް އިޝާރާތް ކުރައްވައި، ޝުޖާޢު ވަނީ އެމްޑީޕީގެ ދެ ފެކްޝަންގެ މެންބަރުންގެ ވާހަކަ އަޑުނޭހުމަށް ގޮވައިލައްވައިފައެވެ. އަދި ދެބައި މީހުން އެއްބަޔަކު އަނެއް ބަޔަކަށް ވަގަށް ގޮވާފައިވެސް ވޯޓު ދޭނީ "ފޮޅި ބަޖެޓް"އަށްކަމަށް އޭނާ ވިދާޅުވިއެވެ.
ޝުޖާޢު ވިދާޅުވި ގޮތުގައި މާޒީގައިވެސް ކަންކަން ހިނގާފައިވާނީވެސް އެހެންނެވެ. އޭނާ ފާހަގަ ކުރެއްވީ ފައިސާ ޗާޕް ކުރަން ރުހުންދިންއިރުވެސް، އެންމެ ފުރަތަމަ ރައީސް ނަޝީދު ފެކްޝަނުން އެކަމާ ދެކޮޅުވި ކަމެވެ.
ބަޖެޓަށް ފާޑުވިދާޅުވި މެމްބަރުންގެ ތެރޭގައި އެމްޑީޕީގެ ކުރީގެ ޕީޖީ ލީޑަރު އަލީ އާޒިމްއާއި، އިމްތިޔާޒު ފަހުމީ(އިންތި)އާއި މުހައްމަދު ވަހީދު (ވައްޑެ) އާއި، އިލްޔާސް ލަބީބާއި، ހަސަން ޝިޔާން ހިމެނިވަޑައިގަންނަވައެވެ.
