ޓެކްސް ބިލަށް ވޯޓަށް ނާހާ މަޖިލީސް ނިންމަލީ ގަވާއިދާ ހިލާފަށް: އަސްލަމް
ޓެކްސް ބޮޑުކުރުމުގެ ބިލަށް ވޯޓަށް ނާހާ މަޖިލީސް ނިންމަލީ ގަވާއިދާ ހިލާފަށްކަމަށް އެމްޑީޕީގެ ޕާލިމެންޓް ގުރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
ޖީއެސްޓީއާއި ޓީޖީއެސްޓީ ބޮޑުކުރުމަށް ޓަކައި ޓެކްސް ގާނޫނަށް ބަދަލު ގެންނަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލު ފާސްކުރުމާ މެދު ގޮތެއް ނިންމަން މިއަދު ނަގަން އޮތް ވޯޓަށް ރިޔާސަތުގައި އިންނެވި ވިލުފުށި ދާއިރާގެ މެމްބަރު ހަސަަން އަފީފު ނޭހުމުން މަޖިލީހުގެ ގިނަ މެމްބަރުން ދަނީ ފާޑުވިދާޅުވަމުންނެވެ.
މިކަމާ ގުޅިގެން އޮންލައިން ނޫހަށް މަޢުލޫމާތު ދެއްވަމުން އަސްލަމް ވިދާޅުވީ މަޖިލީހުގައި ވޯޓެއް ނެގުމަށް ކޯރަމް ހަމަނުވާ ހާލަތުގައި ވޯޓު ނެގުމަށް ބޭނުންވާ މެންބަރުންގެ އަދަދު ހަމަކުރުމަށްޓަކައި ރަގަބީލެއް ޖައްސަވާ 5 މިނިޓުގެ ވަގުތެއް ދޭން ޖެހޭނެކަމަށެވެ.
މީގެ އިތުރުން އަސްލަމް ވިދާޅުވީ މަޖިލީހުގެ ރިޔާސަތުގައި އަފީފް އިންނެވީވެސް ގަވާއިދާ ހިލާފަށްކަމަށެވެ.
ޖީއެެސްޓީ ހަ ޕަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރަން މަޖިލީހަށް ހުށަހަޅައިފައިވަނީ އިހަވަންދޫ ދާއިރާގެ މެމްބަރު މުހައްމަދު ޝިފާއުއެވެ. މިމައްސަލައިގައި އެމްޑީޕީގެ ނަޝީދު ފެކްޝަނާއި ސަރުކާރުގެ ފެކްޝަންގެ މެދުގައި ވަނީ ޚިޔާލު ތަފާތުވުންތައް އުފެދިފައެވެ.
Ads by STO
