އެމްޑީޕީއަށް ދެވަނަ ދައުރެއް ނުދީ، އެ ޕާޓީގެ ކިބައިން ސަލާމަތްވާންޖެހޭ: ޝުޖާއު
ވެރިކަން ކުރާ މައި ޕާޓީ، އެމްޑީޕީއަށް ދެވަނަ ދައުރެއް ނުދީ އެ ޕާޓީގެ "ބަލާ މުސީބާތުން" ދިވެހިން ސަލާމަތްވުމަށް ޕީއެންސީގެ ނައިބު ރައީސް އިބްރާހިމް ޝުޖާއު ގޮވާލައްވައިފިއެވެ.
ހުޅުމާލެ ދާއިރާގެ ކައުންސިލަރު ޝުޖާއު ކުރެއްވި ޓުވީޓެއްގައި ވިދާޅުވީ ކޯޓުތަކުގައި ނުހިނގާ ހިފެހެއްޓިފައި ހުރި މައްސަލަތަކުގެ ސަބަބުން ވަރަށް ގިނަ ރައްޔިތުނަށް އިންސާފު ލިބުމުން މަހުރޫމުވެފައިވާ ކަމަށެވެ.
އަދި މިއީ ވާނުވާ ނުޖަހަން ވަޢުދުވި ސަރުކާރެއް ނަމަވެސް ''ހަބޭހަށް'' ވާނުވާ ޖަހައި އެތައް ބަޔަކު ޖަލުގެ ތޭރިތަކުގެ ތެރޭގައި ތާށިކޮށްލާފައިވާއިރު މައްސަލަތަކެއް ނުހިނގާ ކަމަށް ވެސް އޭނާ ވިދާޅުވިއެވެ.
އެހެންކަމުން އެމްޑީޕީއަށް ދެވަނަ ދައުރެއް ނުދީ މި ބަލާ މުސީބާތުން ސަލާމަތްވާންޖެހޭ ކަމަށް ޝުޖާއު ވިދާޅުވިއެވެ.
މީގެ އިތުރުން ޝުޖާއު ވިދާޅުވީ ޕީޕީއެމްގެ ރިޔާސީ ކެނޑިޑޭޓް ރައީސް ޢަބްދުﷲ ޔާމީން ޢަބްދުލްޤައްޔޫމް ޤައުމު ތަރައްޤީ ކުރައްވަމުން ރައްޔިތުންނަށް އިންސާފު ހޯއްދަވައި ދެއްވުމަށް ނިޒާމު ހަރުދަނާ ކުރައްވާނެކަމީ ކަށަވަރު ކަމެއް ކަމަށެވެ.
ދާދިފަހުން ޕީޕީއެމްއިން ބޭއްވި ޖަލްސާއެއްގައި ރައީސް ޔާމީން ވަނީ ޝަރީޢަތް ނިމެންދެން ޖަލުގައި ބަންދުކޮށްފައި ތިބި މީހުން ވަރަށް ގިނަކަން ފާހަގަކުރައްވައި އެއީ އިންސާފެއް ނޫންކަމަށް ވިދާޅުވެފައެވެ. އަދި ވާނުވާ ޖަހާފައި ބޭތިއްބުމުން އެތައް ބައެއްގެ ޙައްޤުތައް ގެއްލިގެންދާ ކަމަށާއި ވެރިކަން ލިބިވަޑައިގެންފިނަމަ ފުރަތަމަ 10 ދުވަސްތެރޭގައި އެފަދަ އެންމެން ބަންދުން ދޫކޮށްލައްވާނެކަމަށްވެސް ރައީސް ޔާމީން ވިދާޅުވިއެވެ.
Ads by STO
