ވޯލްކަޕް ސްޓޭޑިއަމްތަކުގައި ބަނގުރާ ނުވިއްކޭނެ ކަމަށް ގަތަރުން ބުނެފި
ގަތަރުގައި ތިބި ވޯލްޑް ކަޕް ސަޕޯޓަރުންނަށް މުބާރާތުގެ އަށް ސްޓޭޑިއަމުން ރާ ގަތުމުގެ ފުރުސަތު ނޯންނާނެ ކަމަށް އެ ޤައުމުން ހާމަކޮށްފިއެވެ.
މިފަދަ ނިންމުމެއް ނިންމާފައި މިވަނީ އާދީއްތަ ދުވަހު އަލްޚޯރުގެ އަލްބައިތު ސްޓޭޑިއަމްގައި ގަތަރާއި އިކުއެޑޯ ބައްދަލުކުރާ މުބާރާތުގެ ފުރަތަމަ މެޗު ފެށުމަށް 48 ގަޑިއިރު ކުޑަތަން ވެފައިވަނިކޮށެވެ.
ގަތަރުން އެންމެ ފުރަތަމަ ނިންމާފައިވަނީ ސްޓޭޑިއަމް ބޭރުގައި ސްޓޯލްތައް ބަހައްޓައިގެން ރާ ވިއްކޭ ގޮތަށެވެ. ނަމަވެސް މިއަދު އެއްގޮތަކަށް ވެސް ބަނގުރާ ނުވިއްކޭނެ ކަމަށް ގަތަރާއެކު ފީފާއިން އެއްބަސްވުމަކަށް ވަނީ އައިސްފައެވެ.
ނަމަވެސް ސްޓޭޑިއަމްތަކުގައި ކޯޕަރޭޓް ހޮސްޕިޓާލިޓީގައި ތިބޭ މީހުންނަށް އަދިވެސް ރާ ބުއިމުގެ ހުއްދަ ދޭނެއެވެ.
ފީފާއިން ބުނީ މުބާރާތް ބާއްވާ ގައުމުގެ ކަމާބެހޭ ފަރާތްތަކާއި ފީފާއާ ދެމެދު ކުރެވުނު މަޝްވަރާތަކަށް ފަހު، ގަތަރުގެ ފީފާ ވޯލްޑް ކަޕް ސްޓޭޑިއަމް ސަރަހައްދުގައި ރާ ވިއްކުން މަނާކުރުމަށް ނިންމާފައިވާ ކަމަށެވެ. މިގޮތަށް ފީފާއިން ނިންމާފައިވަނީ ގަތަރުގެ ޝާހީ އާއިލާގެ ޕްރެޝަރުން ކަމަށް ބޭރުގެ މީޑިއާތަކުން ރިޕޯޓްކުރެއެވެ.
