ރައީސް ނަޝީދުގެ ފެކްޝަނަށް ކިޔަންވީ ނަމަކީ ވެރިކަމަށް ދަންޖެހޭ ފެކްޝަން: ރޮޒައިނާ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް މުޙައްމަދު ނަޝީދުގެ ފެކްޝަނަކީ "ވެރިކަމަށް ދަންޖެހޭ ފެކްޝަން" ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒަައިނާ އާދަމް ވިދާޅުވެއްޖެއެވެ.

Ads by MWSC

އެމްޑީޕީގެ އެތެރޭގެ ކޯޅުން ބޮޑުވެފައިވާއިރު، ރައީސް ސޯލިހުގެ ފަޅިން އެންމެ އަޑުގަދަ، އަދި ވަރުގަދަ ތަނބެއްގެ ގޮތުގައި ފެނިވަޑައިގަންނަވަނީ 2013 ވަނަ އަހަރު އެ ޕާޓީއާ ގުޅިވަޑައިގެންނެވި ރޮޒައިނާއެވެ.

ރައީސް ނަޝީދަށް އެންމެ ފަހުން ޓްވިޓަރގައި ދެއްވި ބަހުގެ ހަމަލާއެއްގައި ރޮޒައިނާ ވިދާޅުވީ އެ މަނިކުފާނުގެ ވެރިކަމުގައި ބިޑް ކުރުމަކާ ނުލައި، ގާތް ރަހްމަތްތެރިންނަށް ރަށްތައް ބަަހައިލި ކަަމަށާއި، ކޮރަޕްޝަނާ ދެކޮޅު ފެކްޝަނެއް، އެ ފަދަ ބޭފުޅަކަށް "ލީޑް" ނުކުރެއްވޭނެ ކަމަށެވެ.

"ތިޔަ ފެކްޝަނަށް ކިޔަންވީ ވެރިކަމަށް ދަންޖެހޭ ފެކްޝަން. އަމިއްލަ ޕާޓީގެ ވެރިކަންވެސް ހަޖަމު ނުވަނީ، ތިމާ ވެރިކަމުގައި ނެތީމަ."

ޓްވިޓަރގައި "ހަސަން ކުރުސީ"ގެ ނަމުގައި ހިންގާ އެކައުންޓަށް ދިން ރައްދެއްގައި ރޮޒައިނާ ވިދާޅުވިއެވެ.

އޭނާ މީގެ ކުރިން ވިދާޅުވެފައިވާ ގޮތުގައި، ހަސަން ކުރުސީގެ އެކައުންޓް ގެންގުޅުއްވަނީ ރައީސް ނަޝީދެވެ.

ރޮޒައިނާ ކުރެއްވި އިތުރު ޓްވީޓެއްގައި ވިދާޅުވީ އެމްޑީޕީން ސަޅި ހެޔޮވެރިކަމެއް ކުރާތަން ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ރައްޔިތުންނަށް ފެނިފައިވާ ކަމަށާއި އެ ޕާޓީގެ މެމްބަރުން މަގުމައްޗަށް ނިކުންނާކަށް މިހާރު ނުޖެހޭ ކަމަށެވެ. އަދި ފުލުހުންނާއި ސިފައިންގެ ލޯބި ވެސް ރައީސަށް ލިބިފައިވާ ކަމަށް ރޮޒެއިނާ ވިދާޅުވިއެވެ.

"މީގެއިން އެނގޭނީ މައްސަލަ އަކީ އެމްޑީޕީއެއް ނޫންކަން. އެމްޑީޕީން ކުރިން ވެރިކަން ކުރެއްވި ރައީސް މުހައްމަދު ނަޝީދުކަން." ރޮޒައިނާ ވިދާޅުވިއެވެ.

ރޮޒައިނާ އިތުރަށް ވިދާޅުވީ ރައީސް ޞާލިހު ޤާނޫނާ ހިލާފު ކަންތައްތަކެއް ނުކުރައްވާ ކަމަށާއި އަދި ހުދުމުހުތާރުކަން ދައްކަވައި، ތިމަން ކަނާއަތުން ވާތަށް ނޭނގޭނެ ކަމަށާއި އެންމެން 24 ގަޑިއިރު ހަމައިގައި ހުންނަން ބޭނުންނުވާ ކަމަށް ވިދާޅުވެ ބޭކާރު ވާހަކައެއް ވެސް ނުދައްކަވާ ކަމަށެވެ.

އަދި އެމްޑީޕީ މެމްބަރުން މިއަދު ރައީސް ދައްކަވާ ވާހަކަ މާނަކޮށްދޭން ވެސް އުޅެން ނުޖެހޭ ކަމަށް އޭނާ ވިދާޅުވިއެވެ.