އިންތިހާއަށް މުސާރަ ބޮޑުއިރު ވެސް މެންބަރުން ޖަލްސާއަށް ވަޑައިނުގަންނަވާކަމީ ބޮޑު ހިތާމައެއް: ނަޝީދު
ރައްޔިތުންގެ މަޖިލީހުގެ ޖަލްސާތަކަށް މެންބަރުން ހާޒިރުވެވަޑައިނުގަންވާތީ ރިޔާސަތުން ކަންބޮޑުވުން ފާޅުކުރައްވައިފިއެވެ.
މަޖިލީހުގެ މިއަދުގެ ޖަލްސާއަށް ވަޑައިގަތީ އެންމެ 22 މެންބަރުންނެވެ.
ޖަލްސާ ފަށްޓަވަމުން ދެއްކެވި ވާހަކަފުޅުގައި ރިޔާސަތުގައި އިންނެވި މަޖިލީހުގެ ރައީސް މުޙައްމަދު ނަޝީދު ވިދާޅުވީ 22 މެންބަރުންނަކީ ވަގުތު ފަހަނައަޅައިދިއުމަށްފަހު, ރަނގަބީލު ޖެހުމަށްފަހު ވެސް ހާޒިރުވި މެންބަރުންގެ ޢަދަދު ކަމަށެވެ.
އެގިވަޑައިގަންނަވާނެ މިއީ 87 މެންބަރުންގެ މަޖިލީހެއް. އަދި ކޮންމެ ޢިއްޒަތްތެރި މެންބަރަކަށް ވެސް އިންތިހާއަށް މުސާރަ ލިބިވަޑައިގަންނަވާ. ކޮމިޓީ އެލަވަންސް އެހާމެ ގިނައިން ލިބިވަޑައިގަންނަވާ. މެންބަރެއްގެ މުސާރައިގެ ގޮތުގައި 80 ހާހަށްވުރެ ގިނަ ރުފިޔާ އެބަ ގެއަށް ގެންދަވާ.
ކަންބޮޑުވުން ފާޅުކުރައްވަމުން ނަޝީދު ވިދާޅުވިއެވެ.
ނަޝީދު ވިދާޅުވީ މެންބަރުން އިންތިޚާބުވެވަޑައިގެންފައި ތިއްބަވަނީ ރައްޔިތުންގެ ވަކީލުންގެ ގޮތުގައި މަޖިލީހުގައި ތަމްސީލު ކުރެއްވުމަށް ކަމަށެވެ. ނަމަވެސް މަޖިލީހުގެ ޖަލްސާތަކަށް މެންބަރުން ހާޒިރުވެވަޑައިނުގަތުމަކީ ވަރަށް ބޮޑު ހިތާމައެއް ކަމަށް ވެސް އެ މަނިކުފާނު ވިދާޅުވިއެވެ.
މީގެއިތުރުން ރައީސް ނަޝީދު ވަނީ ޖަލްސާތަކަށް ހާޒިރުވެވަޑައިގެން ބަހުސްތަކުގައި ބައިވެރިވެވަޑައިގަތުމަށް ވެސް މެންބަރުންނަށް އިލްތިމާސް ކުރައްވައިފައެވެ.
