ބަނޑުހައިވެގެން ކާއެއްޗެއް ހޯދަން ކަމަށް ބުނެ ގެއަކަށް ވަން މީހަކު ހައްޔަރުކޮށްފި
ބަނޑުހައިވެގެން ކާއެއްޗެއް ހޯދަން ކަމަށް ބުނެ ގެއަކަށް ވަން މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރު ކޮށްފައިވަނީ ޢުމުރުން 37 އަހަރުގެ ދިވެހި ފިރިހެނެކެވެ. ފުލުހުން އޭނާގެ މައްޗަށް ކުރަނީ ހުއްދަނެތް ތަނަކަށް ވަނުމުގެ ތުހުމަތެވެ.
އޭނާގެ ބަންދާމެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން ބުނެފައިވަނީ އޭނާގެ މަންމަ އެޑްމިޓް ކުރެވިފައިވާ ކަމަށާއި ބަނޑުހައިވެގެން ކާއެއްޗެއް ހޯދަން ގެއަކަށް ވަނީ ކަމަށެވެ. މީގެ އިތުރުން އޭނާ ވަނީ މަސްތުވުމަށް ''ތެޔޮ'' ބޭނުންކުރާ ކަމަށް ބުނެފައެވެ.
ހުށަހެޅިފައިވާ ހެކިތަކަށް ރިޢާޔަތް ކުރެއްވުމަށްފަހު ގާޒީ ޞަފްޢަތު ޙަބީބް ޢަމުރުކުރެއްވީ 10 ދުވަހުގެ މުއްދަތަށް އޭނާ ބަންދުގައި ބެހެއްޓުމަށެވެ.
ކޯޓު އަމުރުގައި ބުނެފައިވަނީ އޭނާއަކީ ޙުކުމެއް ތަންފީޒު ކުރުމަށްފަހު މީގެ ދެމަސް ކުރިން ބަންދުން ވީއްލިފައިވާ މީހެއް ކަމަށާއި މިއީ މި އަހަރުގެ ފުރަތަމަ ހައްޔަރު ކަމަށެވެ. އަދި އޭނާއަކީ 2021 ވަނަ އަހަރު ވައްކަމުގެ ރެކޯޑު ގިނަ މީހެއް ކަމަށެވެ.
