ފިނޭންސް މިނިސްޓްރީގައި 42 އަހަރު: ޢަބްދުﷲ ޢަލީ ރިޓަޔާ ކުރައްވައިފި
ފިނޭންސް މިނިސްޓްރީގައި 42 އަހަރުގެ ޚިދުމަތް ކުރެއްވި އެ މިނިސްޓްރީގެ ޗީފް ފައިނޭންސް އެގްޒެކްޓިވް އޮފިސަރު ޢަބްދުﷲ ޢަލީ ރިޓަޔާ ކުރައްވައިފިއެވެ.
1981 ވަނަ އަހަރު ފިނޭންސް މިނިސްޓްރީއާ ގުޅިވަޑައިގަތް ޢަބްދުﷲ ޢަލީ ރިޓަޔާ ކުރެއްވީ އިއްޔެގައެވެ. ފިނޭންސް މިނިސްޓްރީގައި އިއްޔެ ވަނީ އޭނާގެ ޚިދުމަތްތައް ފާހަގަ ވެސް ކުރައްވައިފައެވެ.
އެކަމާގުޅޭ ފޮޓޯއާއެކު މިނިސްޓަރު އަމީރު ކުރެއްވި ޓުވީޓެއްގައި ވިދާޅުވީ މާލިއްޔަތު ގަވާއިދު އެކުލަވާލުމާއި, ދައުލަތުގެ ފައިސާއާއި ބަޖެޓާބެހޭ ކަންތައްތައް ޢަބުދުﷲ ޢަލީ ކުރައްވާފައިވަނީ އަމާނާތްތެރިކަމާ ތެދުވެރިކަމާއެކީ ކަމުގައެވެ.
ޢަބްދުﷲ ޢަލީ ރިޓަޔާ ކުރެއްވީ އެންމެންނަށް ވަރަށް ގިނަ އަގުހުރި ފިލާވަޅުތަކެއް ދަސްކޮށްދެއްވާފައި ކަމުގައި ވެސް އަމީރު ވިދާޅުވިއެވެ.
ޢަބުދުﷲ ޢަލީ ޝުކުރު އަދާކުރައްވައި އަމީރު އިތުރަށް ވިދާޅުވީ އޭނާ ދިވެހި ދައުލަތައް ކޮށްދެވި އަގުހުރި މަސައްކަތަކީ އެންމެންނަށް ނަމޫނާއެއް ކަމުގައެވެ.
