ނިޝާމާގެ މަރު: މަންމަގެ ފުރާނަ ނެތް ހަށިގަނޑު ކައިރީ ދަރިފުޅު އޮތީ ބުއްބޯން!

މިއަދު މުޅި ގައުމު ސިއްސުވައިލީ ހދ. ނޮޅިވަރަމްގައި އަންހެނަކު މަރާލައިފައި އޮއްވާ ފެނުނު ހަބަރާއެކުއެވެ. އުމުރުން 28 އަހަރުގެ ނިޝާމާ މުހައްމަދު މަރުވެފައި އޮއްވާ ފެނިފައިވަނީ މިއަދު މެންދުރު 12:30 އެހާކަންހާއިރުއެވެ.

Ads by STELCO

ނިޝާމާ އިނދެގެން އުޅެނީ އދ. ފެންފުށީ، ފައިސަލް އަލީއާއެވެ. އެ ދެމަފިރިންގެ 3 ކުދިން ތިބޭއިރު އެންމެ ހަނގު ދަރިފުޅަށް 2 އަހަރު ނުފުރެއެވެ. ދޮށީ ދަރިފުޅަށް ވީ 7 އަހަރެވެ. ދެންހުންނަނީ 4 އަހަރުގެ ކުއްޖެކެވެ.

މި މަރާ ގުޅިގެން އެންމެންވެސް ޝައްކު ކުރަނީ ނިޝާމާގެ ފިރިމީހާއަށެވެ. ސަބަބަކީ އޭނާ އަކީ މަސްތުވާތަކެތީގެ ރިކޯޑް އޮންނަ ފަރާތަކަށް ވުމުގެ އިތުރުން އޭނާ ކުރިން އިން މީހާއަށްވެސް އަނިޔާ ކުރުމުގެ ގިނަ ހާދިސާތަކެއް ހިނގާފައިވުމުން ކަމަށް ގިނަ މީހުން ބުނެއެވެ.

އެ ރަށުން މަޢުލޫމާތު ދިން މީހަކު ބުނީ ނިޝާމާ މަރުވެފައި އޮއްވާ ފެނުނީ އޭނާގެ ކޮޓަރީގެ އެނދުމަތީގައި އޮއްވާ ކަމަށެވެ. އޭނާގެ އާއިލާއިން ކޮޓަރިއަށް ވަންނަން ޖެހުނީ މެންދުރުވީއިރުވެސް ކޮޓަރިން ނުނިކުންނާތީއެވެ. ނިޝާމާގެ ދަރުފުޅު އައިސް “މަންމަ އަދިވެސް ނުދެތުވޭ” ކަމަށް ބުނުމުން އާއިލާ އިން ކޮޓަރިއަށް ވަދެ ބެލިއިރު ނިޝާމާ ކައިރީގައި ކުޑަދަރިފުޅު ބުއްބޯން އޮތްކަމަށް މަޢުލޫމާތު ދިން މީހާ ކިޔައިދިނެވެ.

އޭރު އޭނާގެ ހަބަރު އޮތީ ހުސްވެފައެވެ. އާއިލާގެ މީހުން ބުނާ ގޮތުގައި ނިޝާމާ ފެނުނުއިރު އޭނާގެ ހަށިގަނޑު އޮތީ ވަރަށް ބޮޑަށް ނޫފައިގެންފައެވެ. އެ މީހުން އަވަހަށް ނިޝާމާގެ ހަޑިގަނޑު ގެންދިޔައީ ސިއްހީ މަރުކަޒަށެވެ.

ނިޝާމާގެ އާއިލާއިން މަޢުލޫމާތު ދީފައިވާ ގޮތުގައި އޭނާ މަރާލީ ފިރިމީހާ ކަން ޔަގީނެވެ. އެގޮތަށް ގަބޫލު ކުރަނީ "އެފަދަ ކަމެއް ލޮލުން ފެނިފައި ހުރުމުން" ކަމަށް އާއިލާއިން މައުލޫމާތު ދިން މީހާ ބުނެފައިވެއެވެ.

މި މައްސަލައާ ގުޅިގެން ފުލުހުން ވިދާޅުވީ ނިޝާމާ މުހައްމަދުގެ ފިރިމީހާ ފައިސަލް ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ. ފުލުހުން ބުނީ ނިޝާމާ މުހައްމަދުގެ ހަށިގަނޑުމިހާރު ވަނީ ހދ ކުޅުދުއްފުއްޓަށް ގެންގޮސްފައިކަމަށެވެ. އަދި ހަށިގަނޑު މާލެ ގެނައުމަށް ކުރަންޖެހޭ މަސައްކަތް ފުލުހުން ކުރަމުން އަންނަކަމަށްވެސް ބުނެފައިވެއެވެ.

މީގެއިތުރުން ނިޝާމާގެ ހަށިގަނޑުގެ ޕޯސްޓްމޯޓަމް ހެދުމަށް ތަހުގީގު ޓީމުން ނިންމާފައިވާކަމަށްވެސް ފުލުހުން ބުނެއެވެ.