ބައެއް ސިޔާސީ ލީޑަރުންގެ ކެމްޕެއިން އުކުޅަކީ އެހެން މީހުންގެ ބޮލުގައި ބަދުނާމު އެޅުވުން: މަވޯޓާ
ބައެއް ސިޔާސީ ލީޑަރުން، ކެމްޕެއިން ކުރެއްވުމަށް ބޭނުންކުރައްވާ މައިގަނޑު އުކުޅަކީ، އެހެން ބޭފުޅުންގެ ބޮލުގައި ދޮގު ތުުހުމަތު އެޅުވުން ކަމަށް ރައްޔިތުންގެ މަޖިލީހުގެ މަަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
އަންނަ މަހުގެ 28 ވަނަ ދުވަހު، އެމްޑީޕީގެ ރިޔާސީ ޕްރައިމަރީ ބާއްވަން ނިންމައިފައިވާއިރު، މި އިންތިޚާބުގައި ވާދަކުރައްވާނީގެ، އެ ޕާޓީގެ އިސް ލީޑަރު، ރައީސް އިބްރާހީމް މުޙައްމަދު ޞާލިޙާ، އެ ޕާޓީގެ ރައީސް މުޙައްމަދު ނަޝީދެވެ.
އިންތިޚާބާ ދިމާކޮށް، އެމްޑީޕީގެ ދަފްތަރު ގަޑުބަޑު ކޮށްފައިވާ ކަމަށް ރައީސް ނަޝީދު ކުރައްވާ ތުހުމަތުތަކަށް ނުސީދާކޮށް ރައްދު ދެއްވައި، މަވޯޓާ ކުރެއްވި ޓްވީޓެއްގައި ވިދާޅުވީ ކެމްޕެއިން ކުރައްވައި، ތާއީދު ހޯއްދެވުމަށް ބައެއް ސިޔާސީ ލީޑަރުން ގެންގުޅުއްވާ މައިގަނޑު އުކުޅަކީ އެހެން މީހުންގެ ބޮލުގައި ދޮގު ތުހުމަތާ ވަގު ބަދުނާމު އެޅުވުން ކަމަށެވެ.
"އެބޭފުޅުން އެކަނި އަމާނާތްތެރިންނަކީ. އެބޭފުޅުންގެ އެއްވެސް އަމިއްލަ އެދުމެއްވެސް ނޯންނާނެ." މަވޯޓާ މިއަދު ކުރެއްވި ޓްވީޓުގައި ވިދާޅުވިއެވެ.
އެމްޑީޕީގެ އެތެރޭގެ އިންތިހާބަށް އަމާޒުކޮށް ޕާޓީގެ ދަފްތަރުން މެމްބަރުން އުނި ކުރިކަމުގެ ތުހުމަތުތައް ދަނީ ކުރެވެމުންނެވެ. މިކަމުގެ އެންމެ ބޮޑު ބޭނުމަކީ އިންތިހާބަށް ނުފޫޒު ފޯރުވައި، ރައީސް ނަޝީދަށް ލިބެން ހުރި ވޯޓުތައް ގެއްލުވާލުންކަމަށް އެމަނިކުފާނާއި އަރިސް މެމްބަރުން ވިދާޅުވެއެވެ.
