އެމްޑީޕީއަށްޓަކައި ދޮޅު ލީޓަރު ލޭ އޮހުރުވާލި އިތުރު މީހަކު ނުހުންނާނެ: ރީކޯ މޫސަ

އެމްޑީޕީ އަށްޓަކާ “ދޮޅު ލީޓަރު ލޭ” ހޭދަކުރި ކަމަށް އެ ޕާޓީގެ ކުރީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެއެވެ.

Ads by Hajj Corporation

އެމްޑީޕީގެ ޓިކެޓު ހޯދުމަށް ބާއްވާ ރިޔާސީ ޕްރައިމެރީގައި ވާދަ ކުރައްވާ ރައީސް ޞާލިޙްގެ ޖަގަހަ ޖަލްސާގައި ވާހަކަފުޅުދައްކަވަމުން މޫސަ ވިދާޅުވީ އެ ޕާޓީއަށްޓަކާ ވަރަށް ބޮޑެތި ޤުރުބާނީތަކެއް ވެފައިވާ ކަމަށާއި އޭނާ ނޫނީ ގައިން ދޮޅު ލީޓަރު ލޭ އެމްޑީޕީ އަށްޓަކާ ހޭދަކުރި މީހަކު ނުހުންނާނެ ކަމަށެވެ.

“މި ޕާޓީގަ ވަކި އަޅުގަނޑަށްވުރެ ބޮޑު ގުރުބާނީއެއް ވި މީހަކު ނުހުންނާނެ. އަޅުގަނޑު ނޫނީ ނުހުންނާނެ ގައިން ދޮޅު ލީޓަރު ލޭ މި ގައުމަށްޓަކާ، މި ޕާޓީއަށްޓަކާ ހޭދަކުރި މީހެއް އަނިޔާކޮށްގެން." މޫސަ ވިދާޅުވިއެވެ.

މޫސަ އިޝާރާތް ކުރައްވަނީ 2012 ވަނަ އަހަރު ރައީސް ނަޝީދުގެ ވެރިކަމުން އިސްތިއުފާ ދިނުމާއެކު ހިނގައިދިޔަ ހަމަނުޖެހުމާއެވެ. އެ ހަމަނުޖެހުމުގައި މޫސަގެ ބޯ ވަރަށް ބޮޑަށް ވަނީ ފަޅައިގެން ގޮސްފައެވެ.

މޫސަ ވިދާޅުވީ އެމްޑީޕީގެ ރިޔާސީ ޕްރައިމަރީގައި ކޮންމެ ފަރާތެއް ވާދަކުރި ނަމަވެސް ބޮޑު ތަފާތުން ރައީސް ޞާލިޙް ކާމިޔާބު ކުރައްވާނެ ކަމަށެވެ. އަދި ޕްރައިމަރީ ބޮޑު ތަފާތަކުން ރައީސް ޞާލިޙަށް ކާމިޔާބުކޮށްދޭން ބޭނުންވަނީ ޕާޓީގެ ތެރޭގައި އެމަނިކުފާނަށް އޮތް ތާއީދު ދައްކާލުމުގެ ގޮތުން ކަމަށް މޫސަ ވިދާޅުވިއެވެ.