ކޯލިޝަނަކާއި ނުލައި ވެރިކަމެއް ނުލިބޭނެ، ނަޝީދާއެކު އެމްޑީޕީ ވާނީ ބަލި: މަވޯޓާ

ގިނަ ސިޔާސީ ޕާޓީތަކެއް އެކުވެގެން އުފައްދާ ކޯލިޝަނަކާއި ނުލައި މިހާތަނަށްވެސް އެއްވެސް ބޭފުޅަކަށް ވެރިކަން ލިބިފައި ނުވާކަމަށާއި ރައީސް މުހައްމަދު ނަޝީދު ވިދާޅުވިޔަސް ގިނިކަންޏާއި ނިކުމެ އެމްޑީޕީއަށް އިންތިހާބު ކާމިޔާބު ކުރެވޭތަން ނުފެންނަކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެއެވެ.

Ads by Hajj Corporation

އެމްޑީޕީގެ އެތެރޭގައި ބާއްވާ ރިޔާސީ ޕްރައިމަރީއަށް ފޯރިއާއިއެކު ކެމްޕެއިން ކުރަމުން ދާއިރު ދެ ކެނޑިޑޭޓަކު ވާދަ ކުރެ އެވެ. އެއީ ރައީސް މުހައްމަދު ނަޝީދާއި، ރައީސް އިބްރާހިމް މުހައްމަދު ޞާލިހެވެ. މަވޯޓާ ހުންނެވީ ރައީސް ޞާލިހު ފަޅީގައެވެ.

ރައީސް ޞާލިހު ތާއީދު ކުރައްވަނީ މިހާރުވެސް އޮތް ސަރުކާރު ކޯލިޝަނާއިއެކު މިއަހަރުގެ ރިޔާސީ އިންތިހާބަށް ނިކުންނެވުމަށެވެ. އެހެންނަމަވެސް ރައީސް ނަޝީދު ވިދާޅުވާ ގޮތުގައި އެމްޑީޕީގެ ވެރިކަމެއް ކުރެވޭނީ އެޕާޓީ ގިނިކަންޏާއި އިންތިހާބަށް ކުރިމަތިލައިގެންނެވެ.

ނަޝީދުގެ މިވާހަކަތަކަށް ރައްދު ދެއްވަމުން މަވޯޓާ ވިދާޅުވީ ދުވަހަކު ބަލި ނުވާކަމަށް ނަޝީދު ވިދާޅުވިނަމަވެސް ކޯލިޝަނަކާއި ނުލައި ވެރިކަން ކާމިޔާބުވެފައި ނެތްކަމަށެވެ. އަދި ގިނިކަންޏާ ނިކުމެ އެމްޑީޕީއަށްވެސް ވެރިކަން ލިބޭތަން ނުފެންނަކަމަށް އޭނާ ވިދާޅުވި އެވެ.

"2008 ގައި އެކަނި ލިބިވަޑައިގަތީ އެންމެ 25 އިންސައްތަ، ބިޔަ ބޮޑު އެމްޑީޕީގެ ކެނޑިޑޭޓުގެ ގޮތުގައި ނިކުމެވަޑައިގަތީމަވެސް" މަވޯޓާ ވިދާޅުވި އެވެ.

މީގެ އިތުރުން އޭނާ ވިދާޅުވީ މިއަދު ހާލަތު ބަދަލުވެ ކޯލިޝަނެއް ބޭނުން ނުވާކަމަށް ވިދާޅުވާއިރު ނަޝީދަކީ އެމްޑީޕީގެ ކެނޑިޑޭޓަށް ވެއްޖެނަމަ އެޕާޓީއަށް ވެރިކަން ގެއްލޭނެކަން އެންމެންނަށްވެސް އިނގޭ ކަމަށެވެ. އަދި އެމްޑީޕީއަށް ވެރިކަން ގެއްލެން ބޭނުންނުވާކަމަށްވެސް މަވޯޓާ ވަނީ ވިދާޅުވި އެވެ.

އޭނާ ވިދާޅުވީ މިސަބަބަށްޓަކައި ޗޮއިސްއަކީ ރައީސް ޞާލިހު ކަމަށެވެ.

އެމްޑީޕީގެ ގިނަ މަޖިލިސް މެމްބަރުން ތިއްބެވީ ރައީސް ޞާލިހު ފަޅީގަ އެވެ. އެހެންނަމަވެސް ކެމްޕެއިންތަކަށް ބަލާއިރު ޕާޓީގެ ގިނަ އާންމު މެމްބަރުން ތިބީ ރައީސް ނަޝީދާއިއެކު ކަމަށް ބެލެވެ އެވެ. އެހެންނަމަވެސް މިފަހުން ބޭއްވި އެޕާޓީގެ އެތެރޭގެ އިންތިހާބުތަކަށް ބަލާއިރު ރައީސް ޞާލިހު ޕްރައިމަރީ ކާމިޔާބު ކުރައްވަފާނެކަމަށް ބެލެވެ އެވެ. ރައީސް ނަޝީދު ވިދާޅުވަނީ ޕްރައިމަރީ ބޮޑުތަނުން ކާމިޔާބު ކުރައްވާނީ އެމަނިކުފާނު ކަމަށެވެ. އަދި ރައީސް ޞާލިހު އެމްޑީޕީގެ ކެނޑިޑޭޓުގެ ގޮތުގައި މިއަހަރުގެ ރިޔާސީ އިންތިހާބަށް ކުރިމަތިލި ނަމަވެސް 20 އިންސައްތަ ވޯޓުވެސް އެމަނިކުފާނަށް ލިބިވަޑައިނުގަންނަވާނެކަމަށް ރައީސް ނަޝީދު ވިދާޅުވެ އެވެ.