ރައީސް ޞާލިޙްގެ ޖަލްސާ ބާއްވާ ހަރުގެ ކުރިމަތީގައި ޕީޕީއެމުން މިރޭ މުޒާހަރާކުރަނީ
މި މަހު ބާއްވާ އެމްޑީޕީގެ ޕްރައިމަރީގައި ވާދަކުރައްވާ ރައީސް އިބްރާހީމް މުހައްމަދު ޞާލިޙް ބައިވެރިވެވަޑައިގަންނަވާ ކެމްޕެއިން ޖަލްސާ ބާއްވަން ހަމަޖެހިފައިވާއިރު އެތަނުގެ ކުރިމަތީގައި، އިދިކޮޅުން މުޒާހަރާކުރަން ނިންމައިފިއެވެ.
ރައީސްގެ ކެމްޕޭން ޓީމުން ބުނި ގޮތުގައި އެ އިވެންޓް އޮންނާނީ އެމްޑީޕީގެ މައި ހަރުގޭގައި މިރޭ 9:00 ގައެވެ. އެހެންވެ ރައީސަށް ތާއީދުކުރާ ވީހާ ވެސް ގިނަ ބަޔަކު އެ އިވެންޓްގައި ބައިވެރިވާން ކެމްޕޭން ޓީމުން އެދިފައިވެއެވެ.
ޕީޕީއެމުން ބާއްވާ މުޒާހަރާއާ ގުޅިގެން އެ ޕާޓީގެ ތަރުޖަމާން ހީނާ ވަލީދު ވިދާޅުވީ ވ. އާރަށުގެ މައްސަލާގައި ކުރީގެ ރައީސް އަބްދުﷲ ޔާމީނަށް އިއްވި ހުކުމާ ދެކޮޅަށް ބާއްވާ ހަރަކާތެއް މިރޭ 8:45 ގައި އާޓިފިޝަލް ބީޗުގައި އޮންނާނެ ކަމަށެވެ.
މިދިޔަ މަހުގެ 25 ވަނަ ދުވަހު ރައީސް ޔާމީން 11 އަހަރު ދުވަހަށް ޖަލަށް ލުމަށް ޙުކުމް ކުރުމާ ގުޅިގެން އެމަނިކުފާނު ދޫކޮށްލުމަށް ގޮވާލައި އިދިކޮޅުން ދަނީ ސިލްސިލާކޮށް މުޒާހަރާ ކުރަމުންނެވެ.
