ﷲ ފިޔަވައި އެއްވެސް ފަރާތެއްގެ އަޅަކަށް ނުވާނަން: ރައީސް ޞާލިހް
ﷲ ފިޔަވައި އެއްވެސް މީހަކަށް އަޅުވެތި ނުވާނެކަމަށާއި ކަންކަން ކުރާނީ ހުރިހާ އެއްމެނަށް ފައިދާވާގޮތަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
މިމަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭނުގައި މިރޭ އެޕާޓީގެ ހަރުގޭގައި ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ މަޝްވަރާ އަޑުއައްސަވާނެކަމަށާއި އެހެންނަމަވެސް އެއްވެސް މީހެއްގެ އަޅަކަށް ނުވާނެކަމަށެވެ.
"އަޅުގަނޑެއް އެއްވެސް މީހެއްގެ އަޅަކަށް ނުވާނަން. އަޅުގަނޑު އަޅަކަށް ވާނީ ހަމަ އެންމެ ފަރާތަކަށް. މަޝްވަރާ ދެއްވަންވީ ވާހަކަ ހިއްސާކުރަންވީ އަޅުގަނޑު ކަންކަން ކުރާނީ ރާއްޖޭގެ ހުރިހާ ރައްޔިތުންނަށް ފައިދާ ވާނެހެން" ރައީސުލްޖުމްހޫރިއްޔާ ވިދާޅުވިއެވެ.
ފޯރި ގަދަ ޖަލްސާގައި އިތުރަށް ވާހަކަ ދައްކަވަމުން ރައީސް ވިދާޅުވީ ކަންކަން ނިންމަވަމުން ދަނީ ކެބިނެޓާއި ޕާޓީ މެމްބަރުންނާއި މަޖިލިސް މެމްބަރުންގެ އަޑު އައްސަވައިގެންކަމަށެވެ. ރައީސް ވިދާޅުވީ އެމަނިކުފާނު އިންތިހާބަށް ނުކުމެވަޑައިގެން ހުންނެވީ ތަޖުރިބާތަކަކާއެކުގައި ކަމަށާއި އިންތިހާބު ކާމިޔާބު ކުރާނެ ފޯމިއުލާ އެމަނިކުފާނަށް އެނގިވަޑައިގަންނަވާކަމަށެވެ.
"އަޅުގަނޑު ނުކުމެ މިހުރީ މިއަހަރު ބާއްވާ އިންތިހާބުން ކުރިއަށް އޮތް 5 އަހަރަށް އިންތިހާބުކުރާ ސަރުކާރު އެމްޑީޕީއަށް ކާމިޔާބު ކޮށްދިނުމަށް. އެއްއަހަރަކަށް ނޫން ދެ އަހަރަކަށް ނޫން ތިން އަހަރަކަށް ވެސް ނޫން ފަސް އަހަރަށް. އަޅުގަނޑު ނިކުމެ މިހުރީ ރިޔާސީ އެއް އިންތިހާބު ކާމިޔާބު ކޮށްގެން. އަޅުގަނޑު ނުކުމެ މިހުރީ ތަޖުރިބާތަކަކާއިއެކު. އިންތިހާބު ކާމިޔާބު ކުރާނެ ފޯމިއުލާ ރައްޔިތުންގެ ވޯޓު ހޯދާނެ ގޮތް އަޅުގަނޑަށް ވަރަށް ސާފު" ރައީސް ވިދާޅުވިއެވެ.
އިތުރަށް ވާހަކަ ދައްކަވަމުން ރައީސް ވިދާޅުވީ ކުރިއަށް އޮތް ރިޔާސީ އިންތިހާބު ބޮޑުތަނުން ކާމިޔާބު ކުރައްވާނެކަމަށާއި އެމްޑީޕީ ޕްރައިމަރީވެސް ބޮޑުތަނުން ކާމިޔާބު ކުރައްވާނެކަމަށެވެ. މީގެ އިތުރުން ރައްޔިތުން ހަވާލުކުރާ މަސްއޫލިއްޔަތު އަދާކުރުމުގައި ހަވާލުކުރާ މުއްދަތުގައި ހުންނަން ޖެހޭނެކަމަށާއި އެވިސްނުން ހުންނަން ޖެހޭނެކަމަށެވެ. އަދި އެމަނިކުފާނު ގެންދަވަނީ އެކަން ކުރައްވަމުންކަމަށްވެސް ރައީސް ވަނީ ތަކުރާރުކޮށް ފާހަގަ ކުރައްވާފައެވެ.
Ads by STO
