ޕްރައިމަރީ ކެމްޕޭނަށް ރައީސް ޞާލިހް މިރޭ ހުޅުމާލެ ރައްޔިތުންނާ ބައްދަލުކުރައްވަނީ
މިމަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް މިރޭ ހުޅުމާލެ ރައްޔިތުންނާއި ބައްދަލު ކުރުމަށް ހަމަޖެހިއްޖެއެވެ.
ރައީސްގެ ކެމްޕޭން ޓީމުން މައުލޫމާތު ދެއްވާގޮތުގައި، މިރޭ ހުޅުމާލެ ބްރައިޓްވޭ ސުކޫލުގައި އޮންނަ މިބައްދަލުވުމުގައި ހުޅުމާލޭ ދާއިރާގެ މެމްބަރުންނާއި ކެމްޕޭން ޓީމުތަކާއި ބައްދަލު ކުރައްވާނެއެވެ. މިބައްދަލުކުރެއްވުމުގައި ރައީސް ޞާލިޙް ވެސް ބައިވެރިވެވަޑައިގަންނަވާނެއެވެ.
ރައީސުލްޖުމްހޫރިއްޔާ މިރޭ ހުޅުމާލެ ރައްޔިތުންނާއި ބައްދަލުކުރުމަށް ހަމަޖެހިފައިވާއިރު އެމަނިކުފާނު ރޭ ވަނީ މާލޭގެ އެމްޑީޕީ މެމްބަރުންނާއި ކެމްޕެއިން ޓީމުތަކާ އެކު ހާއްސަ ބައްދަލުވުމެއް ދަރުބާރުގޭގައި ބާއްވައިފައެވެ. މި ބައްދަލުކުރެއްވުމުގައި މާލޭ ރައްޔިތުނަށް ވަނީ އުއްމީދީ ވައުދުތަކެއް ވެވަޑައިގަންނަވައިފައެވެ.
މިގޮތުން ރައީސް ވިދާޅުވީ އެއްވެސް ސަރުކާރަކުން ނުހިންގާވަރުގެ ބޯހިޔާވަހިކަމުގެ މަޝްރޫއެއް މި ސަރުކާރުން ފަށާފައިވާކަމަށާއި މުޅި ރާއްޖޭގައި 16000 ގޯއްޗާއި ފުލެޓާއި ރޯ ހައުސް އަޅަމުން އެބަ ގެންދާކަމަށެވެ.
އަދި މާލެއަށް ހާއްސަކޮށްގެން 7000 ފްލެޓާއި 5000 ގޯތި ދިނުމުގެ މަޝްރޫއެއް ކުރިޔަށް ދާ ކަމަށް ރައީސް ވިދާޅުވިއެވެ.
މީގެއިތުރުން އެމަނިކުފާނުގެ ވާދަވެރި ކެންޑިޑޭޓް، ރައީސް ނަޝީދުގެ ހާއްސަ ކެމްމޭން އިވެންޓެއް ބުރާސްފަތި ދުވަހުގެ ރޭ ރާޅުގަނޑު ސަރަހައްދުގައި އޮންނާނެއެވެ.
Ads by STO
