"އަވަސް އޮންލައިން" ގެ އެޑިޓަރ ގެ މައްޗަށް ކުރެވޭ ޖިންސީ ފުރައްސާރައިގެ ތުހުމަތުތައް ބަލައިދިނުމަށް އެދި ނޫސްވެރިންގެ ޕެޓިޝަނެއް
"އަވަސް" އޮންލައިންގެ ޗީފް އެޑިޓަރ މުންޑޫ އާދަމް ހަލީމްގެ މައްޗަށް ކުރެވޭ ޖިންސީ ގޯނާގެ ތުހުމަތުތައް ބަލައިދިނުމަށް އެދި 19 މީޑިއާއަކުން 73 ނޫސްވެރިން ސޮއިކޮށް ޕެޓިޝަނެއް ހުށަހަޅައިފިއެވެ.
ނޫސްވެރިންތައް އެޕެޓިޝަން ހުށަހަޅާފައިވަނީ ރައީސުލްޖުމްހޫރިއްޔާގެ އޮފީސް، މޯލްޑިވިސް މީޑިއާ ކައުންސިލް، މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސެސް، މިނިސްޓްރީ އޮފް ހޯމް އެފެއާޒް، އަދި މޯލްޑިވްސް ޕޮލިސް ސާވިސް އަށެވެ.
ނޫސްވެރިކަމުގެ ގައުމީ އިނާމުވެސް ހޯދާފައިވާ މުންޑޫ އާދަމް ހަލީމްގެ މައްޗަށް ކޮށްފައިވަނީ، އެނޫހުގައި މަސައްކަތް ކުރި އަންހެން ނޫސްވެރިންތަކަކަށް ތަކުރާރުކޮށް ޖިންސީ ގޯނާ އާއި ފުރައްސާރަކޮށްފައިވާ ކަމުގެ ތުހުމަތުތަކެކެވެ. އެކަމުގެ ޝިކާރައަކަށްވީ ކަމަށް ބުނާ ފަރާތްތަކަކުން އެ ވާހަކަތައް ޓްވިޓާގައި އާންމުކޮށް ވެސް ކޮށްފައިވެއެވެ.
"އަވަސް" ގައި ކުރިން މަސައްކަތްކުރި އަންހެން މުވައްޒަފަކު ވަނީ، މުންޑޫ އޭނާއަށް ޖިންސީ ފުރައްސާރަކުރި ކަމަށް ބުބެ ދާދި ފަހުން އެވާހަކަތައް ޓްވިޓާ މެދުވެރިކޮށް ހިއްސާ ވެސް ކޮށްފައެވެ.
މުންޑޫ އާދަމް ހަލީމްގެ މައްޗަށް މިތުހުމަތުތައް ކުރެވިފައިވާ އިރު، މީގެ ކުރިން ވީމީޑިއާގައި އޭނާ މަސައްކަތް ކުރަމުން ދިޔައިރު އެތަނުގެ އަންހެން މުވައްޒަފެއްގެ ގަޔަށް އަތްލައި ހަމަލާ ދޭ ވީޑިއޯއެއްވެސް އާންމުވެފައިވާކަން ނޫސްވެރިން ހުށަހެޅި ޕެޓިޝަންގައި ފާހަގަ ކޮށްފައިވެއެވެ.
ނޫސްވެރިންގެ ފަރާތުން ހުށަހަޅާފައިވާ ޕެޓިޝަން:
" "އަވަސް އޮންލައިން"ގެ ޗީފް އެޑިޓަރު އާދަމް ހަލީމް އެ ނޫހުގައި މަސައްކަތް ކުރި އަންހެން ނޫސްވެރިންތަކަކާއި މުވައްޒަފުންތަކަކަށް ވަޒީފާގެ މާހައުލުގައި ޖިންސީ ފުރައްސާރަކޮށްފައިވާ ކަމަށް ބުނެ، އެކަމުގެ ޝިކާރައަކަށް ވީ ކަމަށް ބުނާ ފަރާތްތަކަކުން ވަނީ އެ ވާހަކަތައް ޓްވިޓާގައި އާންމުކޮށްފައެވެ. އެކަކަށް ވުރެ ގިނަ ފަރާތްތަކަކުން ނޫހެއްގެ އިތުބާރު ކުރެވޭ އިސް މަގާމެއްގައި ހުރި ފަރާތަކާ މެދު މިފަދަ ތުހުމަތެއް ކު ރުމަކީ އަޅުގަނޑުމެން ނޫސްވެރިން ނިހާޔަތަށް ކަންބޮޑުވާ ކަމެކެވެ.
ނޫސްވެރިކަމުގެ ދާއިރާއިންވެސް އަންހެނުންނަށް ހަމަހަމަ، ފަހި ފުރުސަތުތަކާއި މަސައްކަތުގެ ރައްކާތެރި މާހައުލަކާއި އަދި މަސައްކަތުގައި ދެމިތިބުމަށް އިންތިހާއަށް ހިތްވަރުދޭން ޖެހޭ އިރު، ނޫސްވެރިކަމުގެ ދާއިރާގައި ތަޖުރިބާކާރު އަދި ޝަރަފުވެރި އެތައް އެވޯޑެއް ލިބިފައިވާ ފަރާތަކުން މަސައްކަތުގެ މާހައުލުގައި އަންހެންކުދިންނަށް ފުރައްސާރަކުރުމުގެ ތުހުމަތުތަކެއް ކުރެވުމަކީ ކަންބޮޑުވާ ކަމެކެވެ. "އަވަސް އޮންލައިން"ގައި މަސައްކަތްކުރާ އަންހެން ނޫސްވެރިންނަށާއި އަދި މި ދާއިރާއިން ކުރިއަށް ދިއުމުގެ ހުވަފެން ދެކެމުން އަންނަ ނޫސްވެރިންނަށްވެސް މިއީ ބިރެއް ކަމުގައި އަޅުގަ ނޑުމެން ދެކެމެވެ. އަދި މިއީ މި ދާއިރާއަށް އޮތް އިތުބާރާއި ދާއިރާއާ މެދު އާންމުން ދެކޭ ގޮތާ މެދު ޝައްކު އުފެދޭނެ ފަދަ ކަންތައްތަކެއް ކަމުގައި ގަބޫލުކުރަމެވެ.
އޭނާގެ މައްޗަށް މި ތުހުމަތުތައް ކުރެވިފައިވާ އިރު، މީގެ ކުރިން ވީމީޑިއާގައި އޭނާ މަސައްކަތް ކުރަމުން ދިޔަ އިރު އެތަނުގެ އަންހެން މުވައްޒަފެއްގެ ގަޔަށް އަތްލައި ހަމަލާ ދޭ ވީޑިއޯއެއްވެސް އާންމުވެފައިވާކަން ފާހަގަކުރަމެވެ.
އަޅުގަނޑުމެން ދައުލަތުގެ އިދާރާތަކުގައި މި އެދެނީ މިފަދަ މީހުންގެ މައްސަލަތައް ބަލައި، ކުށްވެރިވާނަމަ ހައްގު އަދަބު ދިނުމަށެވެ. މީގެ އިތުރުން އެފަދަ ތުހުމަތުތައް ކުރެވޭ ފަރާތްތަކަށް މީގެ ކުރިން ދައުލަތުންނާއި އެކިއެކި އިދާރާތަކުން ދީފައިވާ އެވޯޑުތަކާއި "ގަލަން"ތަކާއި ޝަރަފުތައް އަނބުރާ ގެނައުމާ މެދު ވިސްނުމަށެވެ. އެގޮތުން އާދަމް ހަލީމަށް 2010 ވަނަ އަހަރު ނޫސްވެރިކަމުގެ ރޮނގުން ސަރުކާރުން ދީފައިވާ ޤައުމީ އިނާމާއި، މޯލްޑިވްސް މީޑިއާ ކައުންސިލުން 2018 ވަނަ އަހަރު ދިން "ނޫސްވެރިކަމުގެ ރަންގަލަން" އޭނާގެ ކިބައިން އަތުލުމަށް އަޅުގަނޑުމެން އެދެމެވެ.
އަދި މުސްތަގުބަލުގައި އެއްވެސް އިދާރާއަކުން މިފަދަ އެވޯޑުތައް ދޭއިރު މިފަދަ ސީރިއަސް ތުހުމަތުތައް ކުރެވޭ މީހުންނަށް އެފަދަ އެވޯޑުތަކާއި ޝަރަފުތައް ނުލިބޭނެ ފަދަ ގޮތަކަށް އުސޫލުތައް އެކަށައެޅުމަށް އަޅުގަނޑުމެން އެދެމެވެ. އަދި މިފަދަ އެވޯޑެއް ލިބިފައިވާ ފަރާތްތަކަށް ފަހުންވެސް އެފަދަ ތުހުމަތެއް ކުރެވޭނަމަ އެ އެވޯޑަކާއި ޝަރަފުތައް އަތުލެވޭނެ ގޮތުގެ އުސޫލެއް އެކުލަވާލައި އާންމުކޮށް، އަދި އެ އުސޫލުތައް ތަންފީޒުކުރުމަށްވެސް އަޅުގަ ނޑުމެން ނޫސްވެރިން އެދެމެވެ. މިއީ މި ދާއިރާގެ އަގު ހިފެހެއްޓުމަށާއި މި ދާއިރާއަށް ރައްޔިތުންގެ އިތުބާރު އުފައްދައި އަންހެނުންނާއި ޒުވާނުން މި ދާއިރާއަށް ނެރުމަށް ކޮންމެހެން ކުރަން ޖެހިފައި އޮތްކަމެއް ކަމަށް ވެސް އަޅުގަ ނޑުމެން ދެކެމެވެ. އަދި ނޫސްވެރިކަމާއި މީޑިއާގެ ދާއިރާގައި ހަރަކާތްތެރިވާ އަންހެން ނޫސްވެރިންނަށް ރައްކާތެރި މާހައުލެއް ހޯދައިދިނުމަށް އެ މީހުންގެ ހައްގުގައި މަސައްކަތްކޮށްދިނުމަށް ދިވެހި ދައުލަތުގެ އެންމެންހާ މުއައްސަސާތަކުގެ ކިބައިން އަޅުގަނޑުމެން އެދެމެވެ.
ޕެޓިޝަން: ހުރިހާ ނޫސްވެރިންގެ ފަރާތުން
ރައްދުވަނީ: ރައީސުލްޖުމްހޫރިއްޔާގެ އޮފީސް، މޯލްޑިވިސް މީޑިއާ ކައުންސިލް، މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސެސް، މިނިސްޓްރީ އޮފް ހޯމް އެފެއާޒް، މޯލްޑިވްސް ޕޮލިސް ސާވިސް "
