އިއްޔެ ނިޔާވި ނިޝާހްގެ އާއިލާއަށް ރައީސް ތައުޒިޔާ ފޮނުވައިފި
އިއްޔެ ހަވީރު އދ. މާފުށިވަރު ރިސޯޓު ކައިރިއަށް ބޮއި އަޅަން ފައިބައި އުޅެނިކޮށް މޫދުގައި ޚަބަރު ހުސްވެފައި އޮއްވާ ފެނުނު ނިޝާހު ޢަބްދުލް ޢަފޫރުގެ މަރާއި ގުޅިގެން އޭނާގެ އާއިލާއަށް ރައީސުލްޖުމްހޫރިއްޔާ ތައުޒިޔާ ފޮނުއްވައިފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއްކަމަށެވެ.
"އިއްޔެ އަޅުގަނޑުމެންނާ ވަކިވެގެންދިޔަ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް. ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް. އެ މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވާށި." ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވިއެވެ.
އިއްޔެ ނިޔާވި އުމުރުން އެންމެ 18 އަހަރުގެ ނިޝާހު އަކީ އެރަށުގައި މަސް ހިފަން މޫދަށް އެރި އުޅެނިކޮށް ގެނބެމުން ދިޔަ ކުއްޖަކު ސަލާމަތްކޮށްގެން ހިތްވަރު ދެއްކި ބަތަލެކެވެ.
އެގޮތުން 2018 ވަނަ އަހަރު ހިނގި އެހާދިސާގައި ނިޝާހު ދެއްކި ހިތްވަރު ފާހަގަކޮށް ޖެހިގެން އައި އަހަރު އޭނާއަށް ވަނީ ރައީސުލްޖުމްހޫރިއްޔާ ދެއްވާ ޚާއްސަ އިނާމު ލިބިފައެވެ.
އަދި އޭނާގެ ހިތްވަރުގަދަކަން ފާހަގަކޮށް ރާއްޖޭ ސްކައުޓް އެސޯސިއޭޝަނުން 2021 ވަނަ އަހަރު ވަނީ ގެލެންޓަރީ ރަން މެޑަލް ދީފައެވެ.
