ހިކޭތޯ ދުވާލަކު 10 ލީޓަރު ފެން ވެސް ބުއިން: ވިދްޔާ
ބަރުދަން ލުއި ކުރުމަކީ ވަރަށް ގިނަ މީހުން ކުރަން ބޭނުންވާ ކަމެކެވެ. ފިލްމީ ތަރިންނަކީ އަބަދުވެސް ރީތިކޮށް ހުންނަން ބޭނުންވާ ބަޔަކަށްވުމާއެކުގައި، ފިޓްކޮށް ހުރުމަކީ އެ މީހުންނަށް އަދި ވަކީން މުހިންމު ކަމަކަށް އޮންނަނީ ވެފައެވެ.
ބޮލީވުޑްގެ އެންމެ ކާމިޔާބު އެއް ބަތަލާ، ވިދްޔާ ބާލަން އަކީ އެހެން ތަރިންނާ އަޅާބަލާއިރު، ބަރުދަން އިތުރު ކަމުން ފާޑު ކިޔުމާއި، ރިޖެކްޝަންއާވެސް ކުރިމަތިލާން ޖެހުނު ފަރާތެކެވެ.
ވިދްޔާ ވަނީ ބަރުދަން އިތުރުވުމުގެ މައްސަލައާހެދި އޭނާއަށް ކުރިމަތިލާން ޖެހުނު ކަންކަން ކިޔައިދީފައެވެ.
އެގޮތުން މާޒީއަށް ބަލާއިރު، އަބަދުވެސް ބަރުދަން ލުއި ނުވެގެން އެކަމާ ދޭތެރޭގައި ވަރަށް ބޮޑަށް ވިސްނުނު ކަމަށާއި، ގިނައިން ފެން ބޮއެފިނަމަ ހިކޭނެ ކަމަށް މީހަކު ބުނުމުން، އުމުރުން އެންމެ 19 އަހަރުގައި ކޮންމެ ދުވަހަކު 10 ލީޓަރު ފެންވެސް ބުއި ކަމަށް ވިދްޔާ ބުންޏެވެ. މީގެ އިތުރުންވެސް ވަރަށް ކުޑަކޮށް ކެއުމާއި، ދުވާލަކު ދެ ގަޑިއިރު ޖިމުގައި ހޭދަ ކުރުން ފަދަ ކަންކަން ވިދްޔާ އޭރު ވަނީ ކޮށްފައެވެ.
ވިދްޔާ ބުނީ އޭރު އެހައި ބޮޑަށް ބަރުދަނާމެދުގައި ހާސްވީ ނުވިސްނޭތީ ކަަމަށާއި، މިހާރު އޭނާގެ އަމިއްލަ ނަފްސު ބަދަލު ކުރަން ބޭނުން ނުވާ ކަަމަށެވެ. އަދި ހިކިކޮށް ހުންނަން ނުވިސްނައި، ހިތްހަމަޖެހިލައިގެން ކެއުމަކީ އޭނާ އުފާވެރިކޮށް، އަދި ފިޓްކޮށް ހުންނަ ސަބަބު ކަމަށްވެސް ބުންޏެވެ.
