ފެބުރުއަރީ 7 ގެ ހާދިސާ އޮޅޭގޮތަށް އެމްޑީޕީ ވަޒީރުން ވާހަކަ ދައްކަވާ: ރައީސް ނަޝީދު
2012 ވަނަ އަހަރުގެ ފެބުރުއަރީ 7 ވަނަ ދުވަހު ހިނގައިދިޔަ ވެރިކަން ވެއްޓުމުގެ ހާދިސާ އޮޅޭގޮތަށް އެމްޑީޕީއަށް ނިސްބަތްވެވަޑައިގަންނަވާ ބައެއް ވަޒީރުންނާއި ރައްޔިތުންގެ މަޖިލީހުގެ ބައެއް މެމްބަރުން ވާހަކަ ދައްކަވަމުން ގެންދަވާކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގެ ހެނދުނު ދަންފަޅީގައި ފެބުރުއަރީ 7 ގައި ހިނގައިދިޔަ ހާދިސާއާއި ގުޅޭގޮތުން ވާހަކަ ދެއްކެވީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ. އޭނާ ވިދާޅުވި ގޮތުގައި ރައީސް ނަޝީދުގެ ވެރިކަން ވެއްޓި ދިޔުމުގެ ހާދިސާއާއި ގުޅުވައި އެމްޑީޕީން އެންމެ ކުރީއްސުރެއް ތުހުމަތު ކުރަމުން ދިޔައީ އެއީ ބަގާވާތެއްކަމަށް ބުނެ އެވެ. އެހެންނަމަވެސް އަހަރުތަކެއް ފަހުން މިއަދު އެމްޑީޕީގެ ވަޒީރުންނާއި މަޖިލިސް މެމްބަރުން ވިދާޅުވަނީ އެކަން ހިނގައިދިޔައީ ރައީސް ނަޝީދުގެ މައްސަލައަކުންކަމުގައި ކަމަށް އާދަމް ޝަރީފު ވިދާޅުވި އެވެ.
"އެ ވެރިކަން ބަދަލުވެގެން ދިޔަ ދިޔުމާއި ގުޅިގެން އޭރުވެސް އަދި މިހާރުވެސް ޕީޕީއެމްގެ ސްޓޭންޑަކަށް ވެފައި އޮތީ އެއީ ބަގާވާތެއް ނޫންކަމަށް. ކޯނީ ރިޕޯޓުގަވެސް އޮތީ ބަގާވާތެއް ނޫންކަމަށް" އާދަމް ޝަރީފު ވިދާޅުވި އެވެ.
އޭނާ ވިދާޅުވީ މިއަދު އެމްޑީޕީ މެމްބަރުންގެ ވާހަކަ ހުރި ގޮތުން ޕީޕީއެމްއިން ބުނަމުން ދިޔަ ވާހަކަ ސާބިތުވާކަމަށެވެ.
މިވާހަކައާއި ގުޅުވައި ރައީސް ނަޝީދު ވިދާޅުވީ މެމްބަރު ފާހަގަކުރެއްވި ގޮތަށް ބައެއް ވަޒީރުންނާއި މެމްބަރުން ކަންކަން އޮޅުވާލާ ގޮތަށް ވާހަކަ ދައްކަވަމުން ގެންދަވާ ކަމަށެވެ. އަދި އެވާހަކަތަކުގައި ރައީސް ނަޝީދު ބަދުނާމުވާ ގޮތަށްވެސް ބަސްމަގު ހުރިކަން ރައީސް ނަޝީދު ވިދާޅުވި އެވެ.
"ދެން އެއީ އެބޭފުޅުންނަށް އެވަގުތުގައި އެގޮތަށް ވާހަކަ ދައްކަވަން ފެނިވަޑައިގަތީތީ ވާހަކަ ދެއްކެވީ. ދެން މީގެ ތެދު ދޮގު އޮޅޭ މިންވަރަށް އެބަ ކަންކަން ދޭ. އެއީ ހިތާމައެއް. އަޅުގަނޑު އެކަމާ ހިތާމަކުރަން" ރައީސް ނަޝީދު ވިދާޅުވި އެވެ.
އެމަނިކުފާނު ވިދާޅުވީ އެމްޑީޕީގެ ބައެއް ބޭފުޅުން ފެބުރުއަރީ 7 ގެ ހާދިސާއަކީ ބަގާވާތެއް ނޫންކަމަށް ވިދާޅުވަނީ ކީއްވެގެންކަން ބޮޑަށް އެނގިވަޑައިގަންނަވާނީ އެބޭފުޅުންނަށް ކަމަށެވެ.
2012 ވަނަ އަހަރު ރައީސް ނަޝީދުގެ ވެރިކަން ވައްޓައިލަން އިސްކޮށް ނިކުންނެވީ މިހާރުގެ ހޯމް މިނިސްޓަރު އިމްރާން އަބްދުﷲ އާއި ސަރުކާރުގެ ކޯލިޝަން ޕާޓްނަރު ޖޭޕީގެ ލީޑަރު ގާސިމް އިބްރާހިމްގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި އެމްއެންޕީގެ ލީޑަރު ކާނަލް މުހައްމަދު ނާޒިމް އެވެ. މީގެ ތެރެއިން ގިނަ ބޭފުޅުން މިހާރު ތިއްބެވީ އެމްޑީޕީގެ ސަރުކާރުގެ އިސް މަގާމުތަކުގަ އެވެ.
މަރުމޯލުން ތިގޮތަށް ވާހަކަ ދެއްކީމަ މައްސަލައަކީ.
ވެރިކަން ވައްޓާލަން ބަޔަކު ނުކުތީ ކީއްވެ؟ މަނިކުފާނަށް ގައުމު ހިންގަން ނޭނގުނީމަ. އިންޑިއާއަށް މުޅި ގައުމު ވިއްކާލީމަ.
އިސްތިއުފާ ދެމުން ފަށަމުން ބުނީ ކީކޭ އަމިއްލަ ނޫން ބުނީ ތިމާންނާ ވެރިކަމުގައި ހުރެއްޖެއްޔާވާނީ ގެއްލުމޭ އޭގެ މާނައަކީ ތިމާއަކީ ގައުމަށް ހުރި ގެއްލުމެއްކަން އެވަރުވެސް ނޭގޭދޯ އެކަމަކު ޖާނަލިޒަމް ކިޔަވައިގެންނޫން ތިހުރީ