ދަޢުލަތުގެ ތެރޭގައި ރޭވިގެން މަސްތުވާތަކެތި އެތެރެ ކުރާކަމަށް ތުހުމަތު ކޮށްފި

މަސްތުވާތަކެތި ރާއްޖެއަށް އެތެރެކޮށް އެތަކެތި އާންމުކުރުމުގެ މަސައްކަތް ދައުލަތުގެ ތެރޭގައި ރޭވިގެން ކުރިއަށް ގެންދާކަމަށް ގަބޫލުކުރުމުގެ ފުރުސަތު އެބަ އޮތްކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެ އެވެ.

Ads by Sosun Fihaara

ރާއްޖެއަށް މަސްތުވާތަކެތި އެތެރެކުރަނިކޮށް ހައްޔަރު ކުރި މީހަކު އެއްވެސް އަދަބެއް ނުދީ، އަލަށް ހެދި އުސޫލެއްގެ ތެރެއިންކަމަށް ބުނެ ޑީޕޯޓުކޮށްލި މައްސަލައިގައި ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފު މިއަދު ވަނީ މަޖިލީހަށް މައްސަލައެއް ހުށަހަޅުއްވައިފައެވެ.

އެ މައްސަލައަށް ތާޢީދު ކުރައްވައި ބަހުސް މަރުހަލާގައި އިންތި ދެއްކެވި ވާހަކަފުޅުގައި ވިދާޅުވީ ފަޅާ ނާރާ ގޮތަށް އޮމާންކަމާއި އެކީގައި ރާއްޖެއަށް މަސްތުވާތަކެތި އެތެރެކުރެވިއްޖެ ނަމަ އެމީހާ ސަލާމަތްވީ ކަމަށެވެ. އަދި އަލަށް ހެދި އުސޫލުގެ ތެރެއިން ފަޅާ އެރިނަމަވެސް އެމީހަކު ސަލާމަތްވީ ކަމަށެވެ.

އިންތި ވިދާޅުވީ ބިދޭސީން ޑީޕޯޓުކޮށްލުމުގެ އިހުތިޔާރު އިމިގްރޭޝަނަށް ލިބިގެންވާކަމަށް ބައެއް ބޭފުޅުން ވިދާޅުވިނަމަވެސް މަސްތުވާތަކެތީގެ މިފަދަ މައްސަލައެއް ފެންމަތިވުމުން އެމީހެއްގެ މައްޗަށް ރާއްޖޭގެ ގާނޫނުގެ ބާރު ހިނގަންޖެހޭނެ ކަމަށެވެ. އަދި އެ ހާލަތުގައި އިމިގްރޭޝަނަށްވެސް އެމީހާ އަދަބެއް ނުދީ ޑީޕޯޓުކޮށްލުމުގެ އިހުތިޔާރު ލިބިގެން ނުވާނެކަމަށް ވިދާޅުވިއެވެ.

"އަޅުގަނޑުމެންނަށް މިފެންނަނީ މަސްތުވާތަކެތީގެ މައްސަލަތަކާއި ގުޅިގެން ނޫސްތަކުގެ ހެޑްލައިނަށް ބައްލަވާލާ. ގިނަ އަދަދެއްގެ މަސްތުވާތަކެތި ރާއްޖެއަށް އެތެރެވެ އަތުލައިގަނެވިއްޖެއްޔާ އެމައްސަލައެއްގަ ދުވަހަކުވެސް ނެތް ރަނގަޅަށް ތަހުގީގެއް ހިންގިފައެއް" އިންތި ވިދާޅުވިއެވެ.

މެމްބަރު ވިދާޅުވީ މިފަދައިން ކަންކަން ހިނގާތީ މަސްތުވާތަކެތި އެތެރެކޮށް އާންމު ކުރުމަކީ ދަޢުލަތުގެ ތެރޭގައި ރޭވިގެން ހިންގާ ކަމެއްކަމަށް ގަބޫލުކުރުމުގެ ފުރުސަތު އެބައޮތް ކަމަށެވެ.

މީގެ އިތުރުން އިންތި ވަނީ މިމައްސަލައަށްވުރެއް ބޮޑަށް ކަންބޮޑުވަނީ އެމްޑީޕީ ޕީޖީ ގްރޫޕުން މިކަން މަޖިލީހަށް ބަލައިނުގަންނަން ތްރީ ލައިން ރެޑް ވިޕެއް ނެރުމުން ކަމަށެވެ.

މިކަމުން ދޭހަކޮށްދެނީ ސަރުކާރު ޖަވާބުދާރީ ކުރުމަށް މަޖިލީހަށް މަތިކޮށްފައި އޮންނަ ވާޖިބު ނައްތައިލުމަށް މަސައްކަތް ކުރާކަން ކަމުގައި އިންތި ވިދާޅުވިއެވެ.

މަސްތުވާތަކެއްޗާއިއެކު އަތުލައިގަތް މީހާ ޑީޕޯޓުކޮށްލި މައްސަލައިގައި ކުއްލި މައްސަލަ ހުށަހެޅީ އެމްޑީޕީގެ ރައީސް ނަޝީދު ފެކްޝަނުންނެވެ.

މި މައްސަލައަށް ތާއީދު ނުކުރުމަށް އެމްޑީޕީ ޕީޖީ ގްރޫޕުން ތްރީލައިން ވިޕެއް ނެރުނު ނަމަވެސް އެމްޑީޕީއަށް ނިސްބަތްވެވަޑައިގަންނަވާ ބައެއް މެމްބަރުންނާއި ޖުމްހޫރީ ޕާޓީން އަދި އިދިކޮޅު ޕީޕީއެމްއިން ތާއީދު ކުރުމުން މައްސަލަ މަޖިލީހަށް ބަލައިގަނެ ވަނީ ބަހުސް ކުރައްވައިފައެވެ.