ކޯލިޝަން ހެދުމާ މެދު އެމްޑީޕީން މިރޭ ގޮތެއް ނިންމަނީ
މި އަހަރު ބާއްވާ ރިޔާސީ އިންތިހާބުގައި އެހެން ސިޔާސީ ޕާޓީތަކާ އެކު ކޯލިޝަން ހެދުމާ މެދު ގޮތެއް އެމްޑީޕީގެ ގައުމީ މަޖިލީހުން މިރޭ ގޮތެއް ނިންމުމަށް ހަމަޖައްސައިފިއެވެ.
މިރޭ ބާއްވަން ތާވަލުކުރި ޖަލްސާ އޮންނާނީ އިއްޒުއްދީން ސްކޫލްގައި 8:30 ގައެވެ.
ކޯލިޝަން ހެދުމާ ގުޅޭގޮތުން އެމްޑީޕީން މިރޭ ގޮތެއް ނިންމާއިރު އެ ޕާޓީގެ ރިޔާސީ ޓިކެޓް ރައީސް އިބްރާހިމް މުހައްމަދު ޞާލިޙް ވަނީ ކަށަވަރުކުރައްވާފައެވެ. ރައީސް ޞާލިޙަށް އެމްޑީޕީގެ ރިޔާސީ ޓިކެޓު އަންނަ ހުކުރު ދުވަހުގެ ރޭ ހަވާލުކުރާނެ ކަމަށް އެ ޕާޓީން ވަނީ ވިދާޅުވެފައެވެ.
އެމް.ޑީ.ޕީގެ ރިޔާސީ ކެނޑިޑޭޓަކު ހޮވުމަށް ބޭއްވި ޕްރައިމަރީ އިންތިޚާބު، ރައީސް މުޙައްމަދު ނަޝީދާއި ވާދަކުރައްވާ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކާމިޔާބުކުރެއްވީ ތަފާތު ބޮޑު ނަތީޖާއަކާއެކުއެވެ.
ރައީސް ސޯލިހަށް 2018 ވަނަ އަހަރު ވެރިކަން ލިބިވަޑައިގަތީ ވެސް ކޯލިޝަނެއްގެ ތެރެއިންނެވެ. މި ވެރިކަން އުފެއްދީ އެމްޑީޕީގެ އިތުރުން ޖުމްހޫރީ ޕާޓީ އާއި އަދާލަތު ޕާޓީގެ އިތުރުން އެމްއާރުއެމް ހިމެނޭ އިއްތިހާދަކުންނެވެ.
