ރައީސް ޔާމީންގެ މައްސަލަ ލަސްވާތީ އިދިކޮޅުން މިއަދުވެސް ކޯޓަށް
ކުރީގެ ރައީސް އަބްދުﷲ ޔާމީންގެ އިސްތިއުނާފު މައްސަލަ ބަލައިގަތުން ލަސްވާތީ އިދިކޮޅު ޕީޕީއެމް ޕީއެންސީ ކޯލިޝަންގެ ބޭފުޅުން މިއަދު ވެސް ހައިކޯޓަށް ގޮސްފިއެވެ.
އިދިކޮޅު ކޯލިޝަނުން ކޮށްފައިވާ ޓްވީޓެއްގައި ބުނެފައިވަނީ ރައީސް ޔާމީންގެ އިސްތިއުނާފްގެ މައްސަލަ ކޯޓަށް ހުށަހެޅިތާ އެތަށް ދުވަހެއް ވެފައިވާ ކަމަށެވެ. އަދި އެ މައްސަލަ ބަލައިގަތުން ލަސްވާތީ މިއަދު ކޯޓަށް ގޮސްފައިވާ ކަމަށް ޕީޕީއެމުން ބުންޏެވެ.
ރައީސް ޔާމީނުގެ މައްޗަށް އިއްވި ހުކުމް އެމަނިކުފާނުގެ ވަކީލުން ހައިކޯޓުގައި އިސްތިއުނާފުކުރެއްވުމަށް ހުށަހެޅުއްވީ ފެބްރުއަރީ 21 ވަނަ ދުވަހުއެވެ. އަދި އެ މައްސަލަ ހުށަހެޅުއްވުމަށްފަހު ވިދާޅުވެފައިވަނީ ވީ އެންމެ އަވަހަށް މައްސަލަ ކުރިއަށް ގެންދާނެ ކަމުގެ އުންމީދުކުރާ ކަމަށެވެ.
ހައިކޯޓަށް މައްސަލަ ހުށަހެޅިތާ ގިނަ ދުވަސްތަކެއް ފާއިތުވެގެން ގޮސްފައިވާއިރު އެ މައްސަލަ ކޯޓަށް ބަލައިގަނެ ތާވަލުކޮށްފައިނުވާތީ އިދިކޮޅުން އަންނަނީ ކަންބޮޑުވުން ފާޅުކުރަމުންނެވެ.
