އައިޖީއެމްއެޗްގެ ލެބޯޓްރީ ޚިދުމަތް ހުއްޓިއްޖެ
ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލުގެ ލެބޯޓްރީ ޚިދުމަތް ހުއްޓިއްޖެއެވެ.
އައިޖީއެމް ހޮސްޕިޓަލުން މިއަދު ހެނދުނު ވިދާޅުވީ، އެ ޚިދުމަތް ވަގުތީ ގޮތުން ހުއްޓާލާފައިވަނީ ދަރުމަވަންތަ ހޮސްޕިޓަލުގެ ފެނުގެ ސިސްޓަމަށް ދިމާވި މައްސަލައަކާއި ގުޅިގެން ކަމަށެވެ.
އެހޮސްޕިޓަލުން ވަނީ އެކަން ހައްލުކުރެވުނުހާ އަވަހަކަށް އިއުލާން ކުރާނެ ވާހަކަ ދަންނަވައި މިމުއްދަތުގައި ދިމާވެދާނެ ދަތިތަކަށް މަޢާފަށް އެދިވަޑައިގެންފައެވެ.
އައިޖީއެމްއެޗަކީ މާލޭގައި ސަރުކާރުން ސިއްހީ ހިދުމަތް ދެމުން އަންނަ މައި ހޮސްޕިޓަލެވެ. އެ ހޮސްޕިޓަލުން ކޮންމެ ދުވަހަކު އެތައް ސަތޭކަ ރައްޔިތުންނެއް ޚިދުމަތް ހޯދަމުން ދެއެވެ.
މާލޭގެ އިތުރުން އަތޮޅު ތެރެއިންވެސް އެ ހޮސްޕިޓަލުން ޚިދުމަތް ހޯދަން ރައްޔިތުން އާދެއެވެ.
މިއަދު ލެބޯޓްރީގެ އެއްވެސް ޚިދުމަތެއް އައިޖީއެމްއެޗުން ނުދިން ނަމަވެސް އެ ހޮސްޕިޓަލުގައި އެޑްމިޓުކޮށްފައިވާ މީހުންގެ ސާމްޕަލް ނަގައި ހުޅުމާލެ ހޮސްޕިޓަލުގެ ލެބަށް ގެންގޮސް ޓެސްޓުކުރުމުގެ މަސައްކަތް ކުރިއަށް ގެންދާނެކަމަށް ހޮސްޕިޓަލުން ވިދާޅުވެއެވެ.
