އިންތިޚާބުތަކަށް ސަރުކާރުން ނުފޫޒު ފޯރުވާ ކަމަށް ބުނެ މަޖިލީހަށް ޤަރާރެއް

އިންތިޚާބުތަކަށް ސަރުކާރުން ނުފޫޒު ފޯރުވުން ހުއްޓައިލަން ގޮވައިލާ ރައްޔިތުންގެ މަޖިލީހަށް ޤަރާރެއް ހުށަހަޅައިފިއެވެ.

Ads by Sosun Fihaara

ރައްޔިތުންގެ މަޖިލީހަށް މި ގަރާރު ހުށަހެޅުއްވީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި އޮތީ މި ގަރާރު މަޖިލީހަށް ތައާރަފުކުރުމެވެ.

އެ ޤަރާރުގައި އިތުރަށް ބުނެފައިވަނީ 2018 ވަނަ އަހަރު އެމްޑީޕީ ވެރިކަމަށް އައުމަށް އިންތިޚާބުތައް އިންސާފުވެރިކުރުމާއެކު މިނިވަން އިންތިޚާބުތައް ކަށަވަރުކޮށްދިނުމަށް ވެފައިވާ ވައުދާ އެއްގޮތަށް ސަރުކާރުން އެ ވައުދު ތަންފީޒުކުރަމުންދާތައް ނުފެންނަ ކަމަށެވެ. އަދި އެކަމުގައި ސަރުކާރުން ސާފު ސިޔާސަތެއް ގެންގުޅޭކަން އެނގެން ނެތްކަމަށާއި، އިންތިޚާބުތަކަށް ނުފޫޒު ފޯރުވާކަމުގެ ތުހުމަތު ބޮޑުވައިވާ ކަމަށެވެ.

"ރައީސުލްޖުމްހޫރިއްޔާއާއި އަދި ސަރުކާރުގެ އެނޫން ބޭފުޅުން ވާދަކުރައްވާ އިންތިހާބުތަކުގެ ކެމްޕޭން ދަތުރުތައް ސަރުކާރުގެ ރަސްމީ ކަންކަމުގެ ދަތުރުތަކާ އެއްކޮށްލައްވައިގެން ކުރެއްވުމާއި، އެފަދައިން އެއްކޮށްލައްވައިގެން ދަތުރުކުރެއްވުމުގެ ބޭނުމަކީ ދައުލަތުގެ ފައިސާއާއި ވަސީލަތްތަކާއި މުވައްޒަފުންގެ ބޭނުންކުރެވޭ ގޮތް އޮޅުވާލެއްވުން ކަމަށްދެކޭތީއާއި، އަދި އެއީ އިންތިހާބަށް ނާޖާއިޒު ނުފޫޒާއި ބާރު ފޯރުވުންކަމަށް،" ގަރާރުގައި ވަނީ ބުނެފައެވެ.

ގަރާރުގައި ވަނީ އިންތިހާބުތަކުގެ ތެރޭގައި ސަރުކާރުގެ ޕްރޮޖެކްޓްތަކާއި އެސްއެމްއީ ލޯނުތައް އިއުލާނުކުރުމާއި ސަރުކާރުން ތާއީދުކުރާ ކެންޑިޑޭޓަށް ވޯޓު ނުދީފިނަމަ ޕްރޮޖެކްޓްތައް ހުއްޓާލާނެ މޭރުމުން ކެމްޕޭނުގައި ވާހަކަ ދައްކާ އިޒާރުދެމުންގެންދާ ކަމަށްވެސް ބުނެފައެވެ.

ދައުލަތުގެ ބްރޯޑްކާސްޓްކުރާ ފަރާތްތަކުން ކެންޑިޑޭޓުންގެ މެދުގައި ހަމަހަމަ ފުރުސަތު ނުދޭ ކަމަށާއި ސަރުކާރުން ތާއީދުކުރާ ކެންޑިޑޭޓަށް ފާޅުކަން ބޮޑު ގޮތެއްގައި ކެމްޕޭން ކޮށްދޭ ކަމަށް މި ގަރާރުގައި ވަނީ ބުނެފައެވެ.