މެމްބަރުން ވަކި ވުމާބެހޭގޮތުން އިލްހާމް: އެބޭފުޅުން އުންމީދުކޮށްގެން ތިއްބެވީ ވަކިކަމަކަށް!
ޖުމްހޫރީ ޕާޓީގެ ސްލޮޓްތަކުގައި ސަރުކާރުގެ އިސްމަގާމުތަކުގައި ތިއްބެވި މެމްބަރުން އެޕާޓީން ވަކިވަނީ އެބޭފުޅުންނަކީ "ވަކި ކަމަކަށް" އުއްމީދުކޮށްގެން ތިބި ބޭފުޅުން ކަމަށްވާތީކަމަށް ޖޭޕީގެ ލީޑަރުގެ އެޑްވައިޒަރު އިލްހާމް އަހުމަދު ވިދާޅުވެއްޖެއެވެ.
އިލްހާމް ވިދާޅުވީ އިސްތިޢުފާ ދެއްވިކަމަށް ވިދާޅުވި ބޭފުޅުން، ނަމުގައި ޖޭޕީގައި ކިއުއްވިޔަސް ޖޭޕީގެ ސިޔާސީ އެއްވެސް ހަރަކާތެއްގައި ވޭތުވެދިޔަ އަހަރުތަކުގެ ތެރޭގައި އުޅުއްވާފައި ނުވާކަމަށެވެ.
"އިސްތިޢުފާ ދެއްވިކަމަށް ވިދާޅުވި ބޭފުޅުންން، ނަމުގައި ޖޭޕީގައި ކިއުއްވިޔަސް ޖޭޕީގެ ސިޔާސީ އެއްވެސް ހަރަކާތެއްގައި ވޭތުވެދިޔަ 2 އަހަރު،3، 4 އަހަރު ތެރޭގައި އުޅުއްވާފައެއް ނުވޭ! އުންމީދުކޮށްގެން ތިއްބެވީ ވަކިކަމަކަށް. އެމަގަށް ގެންދެވޭތޯ ވަރަށް ޓްރައިކުރެއްވި" އިލްހާމް ވިދާޅުވިއެވެ.
ޖުމްހޫރީ ޕާޓީގެ ސްލޮޓުތަކުގައި ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން ރައީސް އިބްރާހިމް މުހައްމަދު ޞާލިހަށް ތާއިދުކޮށް ޖުމްހޫރީ ޕާޓީގެ މަގާމުތަކުން ވަނީ އިސްތިއުފާ ދީފައެވެ. މިގޮތުން އެމްޓީސީސީގެ ސީއީއޯ އާދަމް އާޒިމާއި އެމްޑަބުލިއުއެސްސީގެ އެމްޑީ ހަސަން ޝާހް އަދި ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުޙައްމަދު ސަލީމް (ސޯނީ) ވެސް ވަނީ ޖޭޕީއިން ވަކިވެފައެވެ.
