ޖޭޕީން ކޯލިޝަން ދަޢުވަތު ޤަބޫލު ނުކުރުމުން ސަރުކާރުގެ ބޮޓުންތައް އުޅެނީ ހުތްވެގެން: އިންތި
ޖުމްހޫރީ ޕާޓީއިން ސަރުކާރުގެ ކޯލިޝަން ދައުވަތު ގަބޫލު ނުކުރުމުން ސަރުކާރުގެ "ބޮޓުންތައް" އުޅެނީ "ހުތް"ވެގެން ކަމަށް ވިދާޅުވެ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ފާޑުވިދާޅުވެއްޖެއެވެ.
އިންތި ވިދާޅުވީ ސަރުކާރުގެ އެންމެ ބޮޑު ވަޢުދަކީ ކޯލިޝަން ހެދުން ކަމަށެވެ.
"ކޯލިޝަން ހެދުން އެންމެ ބޮޑު ވަޢުދުކަމަށްވެ، ދައުވަތުގެ ސިޓީ ފޮނުވައި، އާދޭސްކޮށް ހެދުމުން ވެސް ސަރުކާރުގައި އޮތް އެންމެ ބޮޑު ކޯލިޝަން ޕާރޓްނަރ އެކަމަށް ނޫނެކޭ ބުނުމުން ދެން މިހާރު މޭބިސްކަދުރު ހުތްވެގެން އުޅޭހެން ސަރުކާރުގެ ބޮޓުންތައް އުޅޭތަން ފެންނަނީ." އިންތި ވިދާޅުވިއެވެ.
އޭނާ މިހެން ވިދާޅުވީ ސަރުކާރު ހިނގާ ކޯލިޝަންގެ އެންމެ މުހިންމު އެއް ޕާޓީ ކަމުގައިވާ ޖުމްހޫރީ ޕާޓީން އަންނަ ރިޔާސީ އިންތިހާބުގައި ވަކިން ވާދަކުރެއްވުމަށް ނިންމެވުމާއި ގުޅިގެން ސަރުކާރުގެ އިސް މަޤާމުތަކުގައ ތިބި ޖުމްހޫރީ ޕާޓީގެ ބޭފުޅުން އިސްތިއުފާ ދިނުމަށް ސަރުކާރަށް ތާއީދު ކުރައްވާ ފަރާތްތަކުން ގޮވާލައްވަމުން އަންނަ ދަނޑިވަޅެއްގައެވެ.
އަދި މީގެ އިތުރުން އެބޭފުޅުން އިސްތިއުފާ ނުދެއްވައިފި ނަމަ މަޖިލީހުގައި އިތުބާރު ނެތް ކަމުގެ ވޯޓް ނަންގަވައި ވަކި ކުރައްވާނެކަމުގެ އިޝާރާތެއް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު ރާއީ ދެއްވާފައިވަނިކޮށެވެ.
Ads by STO
