މިއަހަރުގެ ބެސްޓް ޓޫރިޒަމް ވިލެޖެސްގައި ވާދަ ކުރުމުގެ ފުރުސަތު ހުޅުވައިލައިފި
އ.ދގެ ފަތުރުވެރިކަމާއި ބެހޭ މައި އިދާރާ ޔޫއެންޑަބްލިއުޓީއޯގެ "ބެސްޓް ޓޫރިޒަމް ވިލެޖެސް 2023″ ގައި ވާދަ ކުރުމުގެ ފުރުސަތު ރާއްޖޭގެ ރަށްތަކަށް ހުޅުވައިލައިފިއެވެ.
ޓޫރިޒަމް މިނިސްޓްރީން ވިދާޅުވީ، ބެސްޓް ޓޫރިޒަމް ވިލެޖެސް 2023 އަށް ރާއްޖޭގައި ދިރިއުޅުމުންދާ އާބާދީގައި 15،000 ހަމަ ނުވާ ކޮންމެ ރަށަކަށް ކުރިމަތި ލެވޭނެ ކަމަށެވެ. މިނިސްޓްރީން ވިދާޅުވީ މި މިބާރާތަށް ރާއްޖޭގެ އަށް ރަށަކަށް ޕްރޮޕޯސަލް ހުށަހެޅޭނެ ކަމަށެވެ.
މިގޮތުން ހުށަހަޅާ ރައްތަކުގެ ތެރެއިން މިކަމަ ބޭނުންވާ އެޕްލިކޭޝަން ފޯމާއި، "ކެންޑިޑެންސީ ޑޮކިއުމެންޓް" ފުރިހަމަކުރުމަށާއި ވީޑިއޯ އަދި ޖެނެރަލް ޕްރެޒެންޓޭޝަން ތައްޔާރުކުރުމުގައި މިނިސްޓްރީން ރަށްތަކަށް އެހީތެރިކަން ފޯރުކޮށްދެއްވުމަށް ވަނީ ނިންމަވައިފައެވެ.
އަދި މިރަށްތަށް "ބެސްޓް ޓޫރިޒަމް ވިލެޖަސް 2023″ ގައި ވާދަކޮށް ކާމިޔާބު ކުރުމަށްޓަކައި މިނިސްޓްރީގެ ފަރާތުން މިރަށްތަކާއިއެކު މަސައްކަތް ކުރުމަށް ހަމަޖެހިފައިވާކަންވެސް ވަނީ ފާހަގަކުރައްވައިފައެވެ.
ބެސްޓް ޓޫރިޒަމް ވިލެޖެސް ގޮތުގައި ހޮވިއްޖެ ނަމަ، އެ ނެޓްވޯކްގެ އެހެން އަވަށްތަކާއި ގުޅިގެން ފަތުރުވެރިކަން ކުރިއެރުވުމަށް ގުޅިގެން އެކި ޕްރޮގްރާމްތައް ކުރިއަށް ގެންގޮސް ބައިވެރިވުމަށް މަގުފަހިވެގެން ދާނެއެވެ.
ރަށްތަކުން މިކަމަށް ކުރިމަތިލުމަށް ބޭނުންވާ ފޯމް މިކަމާއި ގުޅޭ އިޢުލާނާއި ގެޒެޓްގައި ވަނީ ޝާޢިއު ކުރެވިފައެވެ.
މިއާއެކު ނަން ހުށަހަޅާ ރަށްތަކުގެ ތެރެއިން ފަތުރުވެރިކަން ފުޅާވުމަށް މަގުފަހިވެފައިވާ މިންވަރަށް ބެލުމަށްފަހު އެންމެ ރަނގަޅު ރަށްތަކުގެ ތެރެއިން ގިނަވެގެން އަށް ރަށް ރާއްޖޭގެ ފަރާތުން "ބެސްޓް ޓޫރިޒަމް ވިލެޖަސް 2023″ އަށް ހުށަހެޅިގެންދާނެއެވެ.
