ޙާރިޖީ ވުޒާރާއަށް ގިނަ ޚިދުމަތްތަކެއްކޮށްދެއްވި އާބިދާ ނިޔާވެއްޖެ
ޙާރިޖީ ވުޒާރާއަށް 40 އަހަރަށްވުރެ ގިނަ ދުވަހު ޚިދުމަތް ކޮށްދެއްވި އާބިދާ އަޙުމަދު ނިޔާވެއްޖެއެވެ.
އާބިދާ ނިޔާވުމާއި ގުޅިގެން މިނިސްޓަރު ޝާހިދު ކުރެއްވި ޓްވީޓެއްގައި ވިދާޅުވީ ޓީމް ޚާރިޖީއަށް ގެއްލިގެން ދިޔައީ އަގު ނުކުރެވޭވަރުގެ މެމްބަރެއްކަމަށެވެ. އަދި އޭނާގެ ވަކިވުމަކީ ފޫނުބެއްދޭނެވަރުގެ ކަމެއް ކަމަށް ވެސް މިނިސްޓަރު ވިދާޅުވިއެވެ.
އާބިދާ ފޮރިން މިނިސްޓްރީއާއި ގުޅިވަޑައިގެންފައިވަނީ 1985 ވަނަ އަހަރުއެވެ. ފޮރިން މިނިސްޓްރީގައި އާބިދާ އެންމެ ގިނަ ދުވަހު ޚިދުމަތް ކުރެއްވީ އިދާރީ ހިންގުމާބެހޭ ސެކްޝަން ތަކުގައްޔާއި، ޑިޕާޓްމަންޓްތަކުގައެވެ.
އޭގެ ކުރިން އޭނާ މަސައްކަތްކުރެއްވީ މޯލްޑިވްސް އެއާޕޯޓްސް އޮތޯރިޓީގެ ޓެލެފޯން އޮޕަރޭޓަރެއްގެ ގޮތުގައެވެ. އަދި މުލީއާގެ މެއިޑެއްގެ ވަޒީފާވެސް އޭނާ ވަނީ އަދާކުރައްވައިފައެވެ.
އާބިދާ ނިޔާވީ ރޭ ދަންވަރުގެ ވަގުތެއްގައެވެ. ނިޔާވި އިރު އުމުރުފުޅަކީ 66 އަހަރެވެ. އާބިދާގެ ކަށު ނަމާދު އޮންނާނީ މިއަދު އަޞްރު ނަމާދަށް ފަހު އާސަހަރާ މިސްކިތުގައެވެ.
