ނަޝީދު މަޖިލިސް މެމްބަރުންނަށް އިންޒާރު ދޭކަމަށްބުނެ ރޮޒައިނާ ވީޑިއޯއެއް އާންމު ކުރައްވައިފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީއަށް ނިސްބަތްވެވަޑައިގަންނަވާ މެމްބަރުންނަށް އިންޒާރު ދޭކަމަށްބުނެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވީޑިއޯއެއް އާންމުކުރައްވައިފިއެވެ.
މަޖިލިސް ކުރާ ގޭގެ ގޯތި ތެރޭގައި ނަގާފައިވާ މި ވީޑިއޯ ރޮޒައިނާ އާންމު ކުރެއްވީ ޓުވިޓާގައެވެ. އެވީޑިއޯގައި ފެންނަނީ ރައީސް ނަޝީދު އަވަސް ހިނގުމެއްގައި ވަޑައިގެން ހުޅުމާލެ ދާއިރާގެ މެމްބަރު އަލީ ނިޔާއަށް އިނގިލި ދިއްކުރައްވައި ކޮންމެވެސް ވާހަކައެއް ވިދާޅުވާ މަންޒަރެވެ.
ވީޑިއޯގައި ރައީސް ނަޝީދު ދައްކަވާ ވާހަކަ އަޑެއް ނީވެ އެވެ. އެހެންކަމުން ދެއްވަނީ އިންޒާރުކަން ކަށަވަރުވާކަށް ނެތެވެ.
https://twitter.com/Roxeyna/status/1665962259951255552
އެހެންނަމަވެސް މި ވީޑިއޯ ހިއްސާކުރައްވައި ރޮޒައިނާ ވިދާޅުވީ މަޖިލިސް ތެރޭގައި މަޖިލިސް ރައީސް މެމްބަރުންނަށް އިންޒާރުދީ ބިރުދައްކަމުންދާ މައްސަލައަކީ ސީރިއަސް މައްސަލައެއް ކަމަށެވެ.
"މެމްބަރުންގެ ރައްކާތެރިކަން ކަށަވަރުކޮށްދޭންޖެހޭ ފަރާތުން މިއަދު އެތައް މެމްބަރުންނަކަށް ބިރު ދައްކާ، މަޖިލިސް ނައިބުރައީސްގެ މައްސަލަ އަނބުރާ ގެންދަން އަންގާ އިންޒާރު ދީފި" ރޮޒައިނާ ވިދާޅުވިއެވެ.
ރައީސް ނަޝީދު އަދިވެސް ހުންނެވީ އެމްޑީޕީގެ ރައީސްކަމުގެ މަޤާމުގައެވެ. އެހެންނަމަވެސް އެމަނިކުފާނަށް ސިޔާސީ ގޮތުން ތާއީދު ކުރައްވާ ބޭފުޅުން އިސްވެ ތިބެ "ދަ ޑިމޮކްރެޓްސް" ގެ ނަމުގައި ޕާޓީއެއް ރަޖިސްޓްރީ ކުރުމުގެ މަސައްކަތް ދަނީ ކުރަމުންނެވެ.
ރައީސް ނަޝީދު އެމްޑީޕީގައި ހުންނެވި ނަމަވެސް އެޕާޓީގައި އެމަނިކުފާނުގެ އެއްވެސް ބާރެއް ނެތެވެ. ރައްޔިތުންގެ މަޖިލީހުގެ މެމްބަރުންގެ ގޮތުގައި ތިއްބެވި އެމްޑީޕީގެ މެމްބަރުންވެސް ގެންދަވަނީ ރައީސް ނަޝީދަށް ބަހުގެ ހަމަލާތައް ރައްދު ކުރައްވައި އެމަނިކުފާނާއި ދެކޮޅަށް ސިޔާސީ ވާހަކަ ދައްކަވަމުންނެވެ.
Ads by STO
