ރައީސް ނަޝީދު މަޖިލީހުގެ ރައީސްގެ މަޤާމުން ދުރުކުރަން އެމްޑީޕީ ޕީޖީން ފާސްކޮށްފި
އެމްޑީޕީގެ ރައީސް މުހައްމަދު ނަޝީދު ރައްޔިތުންގެ މަޖިލީހުގެ ރައީސްގެ މަގާމުން ދުރުކުރަން އެމްޑީޕީ ޕާލަމެންޓަރީ ގްރޫޕުގެ އަގުލަބިއްޔަތުން ފާސްކޮށްފި އެވެ.
އެމްޑީޕީ ޕީޖީ ގްރޫޕުގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ އެމްޑީޕީގެ ޕީޖީ ގްރޫޕުގެ 110 ވަނަ ބައްދަލުވުމުގައި ރައީސް ނަޝީދުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅައި އެމްޑީޕީން އިސްވެ އޮވެ އެމައްސަލަ ކުރިއަށް ގެންދަން ނިންމާފައިވާ ކަމަށެވެ.
ރައްޔިތުންގެ މަޖިލީހުގައި އެމްޑީޕީއަށް ނިސްބަތްވާ މިހާރު ތިބެނީ 56 މެމްބަރުންނެވެ. އޭގެ ތެރެއިން މިއަދުގެ ޕީޖީ ބައްދަލުވުމުގައި ބައިވެރިވީ 42 މެމްބަރުންނެވެ. ރައީސް ނަޝީދުގެ އިތުބާރު ނެތްކަމަށް ހުށަހަޅަން ފާސްވީ 36 މެމްބަރުންގެ ވޯޓާއިއެކު އެވެ.
މިމައްސަލަ މަޖިލީހަށް ހުށަހަޅަން ޖެހޭނީ މެމްބަރުން ސޮއިކޮށްފައިވާ ލިޔުމަކާއިއެކު އެވެ. އެމްޑީޕީ ޕީޖީން މިކަން ފާސްކުރި ނަމަވެސް އަދި ސޮއި ހޯދާކަށް ނުފަށަ އެވެ. އެހެންކަމުން ސޮއި ކުރާނެ އަދަދާއިމެދު އަދި އެއްޗެއް ދަންނަވަން އުނދަގޫކަމަށް ޕީޖީ ލީޑަރު އަސްލަމް ވިދާޅުވި އެވެ.
އަސްލަމް ވިދާޅުވީ މަޖިލީހުގެ ރައީސްގެ ހައިސިއްޔަތުން ރައީސް ނަޝީދު ކަންތައްތައް ކުރައްވަމުން ގެންދަވާ ގޮތާއި ގުޅޭގޮތުން މެމްބަރުންގެ ކަންބޮޑުވުން ވަރަށް ބޮޑުކަމަށެވެ. އެގޮތުން މަޖިލީހުގެ ގަވާއިދުތަކަށް ރައީސް ނަޝީދު ހުރުމަތްތެރިކޮށް ނުހިއްތަވާކަން އެމްޑީޕީގެ މެމްބަރުން މަޖިލިސް ތަޅުމުގައާއި އެހެނިހެން ފޯރަމްތަކުގައި ފާހަގަކުރައްވާފައިވާކަން އަސްލަމް ފާހަގަކުރެއްވި އެވެ.
"އަދި ވަކިން ހާއްސަކޮށް މިއަދުގެ އެޖެންޑާއަށް ބަލައިލާއިރު، އެޖެންޑާގެ މަސައްކަތްތައް ކުރިއަށް ދާގޮތާ، އިތުބާރު ނެތްކަމަށް އެޓާނީ ޖެނެރަލްގެ މައްސަލަ ހުށަހެޅުމުން އެ އިތުބާރު ނެތްކަމުގެ މައްސަލައާއި ގުޅޭގޮތުން މަޖިލީހުގެ ރިޔާސަތުން ނިންމަވަމުން ދިޔަ ނިންމެވުންތަކާ އެމައްސަލަ ކުރިއަށް ނުގެންދެވި މުޅި މަޖިލިސް ހުއްޓުމަކަށް އަންނަންޖެހޭ ހިސާބަށް ކަންތައް ވަމުން ދިޔައީ މަޖިލީހުގެ ރިޔާސަތުން އަމަލުކުރާ ގޮތުންކަމުގަ އަޅުގަނޑުމެންނަށް ގަބޫލު ކުރެވޭ" އަސްލަމް ވިދާޅުވި އެވެ.
