މަޖިލީހުގެ ރައީސް ކަމަށް އަޅުގަނޑުގެ ނަން ހުށަހަޅައިފި ނަމަ، ހިތުގެ އަޑިން ޤަބޫލުކުރާނަން: އަސްލަމް
މަޖިލީހުގެ ރައީސް ކަމުގެ މަގާމަށް އެމްޑީޕީގެ ޕާލިމެންޓްރީ ގްރޫޕުގެ ފަރާތުން އޭނާގެ ނަން ހުށަހަޅައިފި ނަމަ، އެކަން ހިތުގެ އަޑިން ގަބޫލުކުރައްވާނެ ކަމަށް އެ ގްރޫޕުގެ ލީޑަރު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް މިއަދު ވިދާޅުވެއްޖެއެވެ.
މިއަދު އެމްޑީޕީ ޕީޖީ ގްފޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަސްލަމް ވިދާޅުވީ މަޖިލީހުގައި މިހާރު ހިނގަމުންދާ ކަންތައްތަކާއި ގުޅިގެން ރައީސް ނަޝީދަށް ކުރަމުން އައި އިހްތިރާމާއި ލޯބި ކުޑަވަމުންދާ ކަމަށެވެ.
އަދި މިއަދަކީ އެމަނިކުފާނު މަޖިލީހުގެ ރައީސް ކަމުގައި ބައިންދައިގެން އިތުރަށް ކުރިއަށް ގެންދެވިދާނެ ކަަމަށް ގަބޫލު ނުކުރެވުނު ހިސާބަށް އައި ދުވަސް ކަމަށާއި ފާލެމެންޓްރީ ގްރޫޕުން މަޖިލީހުގެ ރައީސް ކަމަށް އޭނާގެ ނަން ހުށަހަޅައިފި ނަމަ އެކަން ބަލައިގަންނާނެ ކަމަށް އަސްލަމް ވިދާޅުވިއެވެ.
“ޕާލިމެންޓްރީ ގްރޫޕުން އެފަދަ ނިންމުމެއް ނިންމަވައި އަޅުގަނޑާ ހަވާލުކުރަން ނިންމަވައިފިއްޔާ ހަމަ ހިތުގެ އަޑިން އެކަން ގަބޫލުކޮށް، އެ މަސައްކަތް ކުރިއަށް ގެންދަވާނެ ވާހަކަ ދަންނަވަން" އަސްލަމް ވިދާޅުވިއެވެ.
އަސްލަމް މިފަދައިން ވިދާޅުވެފައިވާއިރު ރައީސް ނަޝީދު ގެންދަވަނީ ރައްޔިތުންގެ މަޖިލީހުގައި މިހާރު ކުރިއަށްދާ ބަންޑާރަ ނައިބު ރިފްއަތު އިބްރާހިމްގެ އިތުބާރު ނެތް ކަމުގެ މައްސަލަ ކުރިއަށް ނުގޮސް މަޖިލިސް ހުއްޓުވަމުންނެވެ.
މިކަމާއި ގުޅިގެން އެމްޑީޕީ ޕީޖީ ގްރޫޕުގެ މެމްބަރުން ވަނީ ރައީސް ނަޝީދުއަށް ވަރަށް ބޮޑަށް ފާޑުވިދާޅުވެފައެވެ. އަދި ރައީސް ނަޝީދު މަޖިލީހުގެ ރައީސް ކަމުން ވަކިކުރަން ހުށަހަޅަން އެމްޑީޕީ ޕީޖީ ގްރޫޕުން ވަނީ މިއަދު ފާސްކޮށްފައެވެ. މަޖިލީހަށް އެމައްސަލަ ވެއްދުމަށް ބޭނުންވާ 44 މެމްބަރުންގެ ސޮއި ވެސް ވަނީ ހަމަކޮށްފައެވެ.
Ads by STO
