ވެރިކަން ލިބިއްޖެނަމަ މުސްކުޅިންގެ އެލަވެންސް 7000އަށް ބޮޑުކޮށްދޭނަން: ޤާސިމް

އުމުރުން 65 އަހަރުން މަތީގެ މީހުންނަށް ސަރުކާރުން މިހާރު ދެމުން އަންނަ އެލަވެންސް ބޮޑުކޮށްދެއްވާނެ ކަމަށް ޖުމްހޫރީ ޕާޓީގެ ރިޔާސީ ކެނޑިޑޭޓް, ޤާސިމް އިބްރާހީމް ވިދާޅުވެއްޖެއެވެ.

Ads by STELCO

ޤާސިމް މިހެން ވިދާޅުވެފައިވަނީ އެމަނިކުފާނަށް ރިޔާސީ ޓިކެޓް އެރުވުމަށް މިރޭ ކާނިވަލުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ޤާސިމްގެ ވާހަކަފުޅުގައި އެމަނިކުފާނުގެ މެނިފެސްޓޯގައި ހިމެނޭ ބައެއް ކަންކަން ވިދާޅުވިއެވެ. މެނިފެސްޓޯގެ ބައެއްކަންކަން ލިސްޓް ކުރައްވަމުން ވިދާޅުވެފައިވަނީ, ވަގުތު ނެތުމުން ތަފްސީލަށް ދެވެން ނެތް ކަމަށެވެ. އަދި ފަހުން ވަރަށް ތަފްސީލްކޮށް އެކަންކަން ކިޔާދެއްވާނެ ކަމަށް ވިދާޅުވިއެވެ.

މިހާރު އުމުރުން ދުވަސްވީ މީހުންނަށް ސަރުކާރުން ކޮންމެ މަހަކު 5,000 ރުފިޔާގެ އެލަވެންސެއް ދެއެެވެ. ސަރުކާރުން ވަނީ މި އެލަވެންސް ބޮޑު ކުރަން މަސައްކަތް ކުރާ ކަމުގެ އިޝާރާތެއް ދާދިފަހުން ދެއްވާފައެވެ. ޤާސިމް ވައުދުވެ ވަޑައިގެންނެވީ ޖޭޕީގެ ސަރުކާރެއްގައި މިއަދަދު 7000އަށް ބޮޑުކޮށްދެއްވާނެ ކަމަށެވެ.

މެނިފެސްޓޯގައި ހިމެނޭ އިޤްތިޞާދީ ބައެއް ވާހަކަފުޅުތައް ވެސް ޤާސިމް ވިދާޅުވެ ދެއްވިއެވެ. މިގޮތުން ވިދާޅުވީ, ގާސިމް ވިދާޅުވީ ވެރިކަމުގެ ފުރަތަމަ 3 އަހަރު ތެރޭ ދައުލަތުގެ ދަރަނި ޖީޑިޕީގެ ނިސްބަރުން 120 އިންސައްތައިން 90 އިންސައްތައަށް ދަށް ކޮށްދެއްވާނެ ކަމުގައެވެ. އަދި ދައުލަތުގެ ޚަރަދު ޖީޑީޕީގެ ނިސްބަރުން 30 އިންސައްތައަށް ދަށްކޮށް، އާމްދަނީ 30 އިންސައްތަ މަތިކޮށްދެއްވާނެކަމަށްވެސް ވިދާޅުވިއެވެ.

މިރޭ ރިޔާސީ ޓިކެޓާއި ހަވާލުވެވަޑައިގެން، ގާސިމް ވަނީ ރިޔާސީ އިންތިހާބުގައި ބޭނުން ކުރާނެ ޝިއާރާއި އިންތިހާބުގައި ބޭނުން ކުރާނެ ލަވަ ވެސް އިފްތިތާހު ކޮށްދީފައެވެ. ގާސިމް ގެ ރިޔާސީ އިންތިހާބުގެ ޝިއާރަކީ "ހާސްކަނޑާލާ، ހަމަޖެހޭނެ" މި ޝިއާރެވެ.