އީވާގެ އިތުބާރު ނެތް މައްސަލަ އެޖެންޑާ ކުރުން އިސްތިސްނާ ކުރެވޭނެ ޙާލަތެއް ނެތް ކަމަށް ބުނެފި
ރައްޔިތުންގެ މަޖިލީހުގެ ނައިބު ރައީސް، އީވާގެ އިތުބާރު ނެތް މައްސަލަ، އެޖެންޑާ ކުރުން އިސްތިސްނާ ކުރެވޭ އެއްވެސް ޙާލަތެއް ނެތް ކަމަށް ވެރިކަން ކުރާ މައި ޕާޓީ، އެމްޑީޕީން ބުނެފިއެވެ.
އެމްޑީޕީން ވަކިވެ، އައު ސިޔާސީ ޕާޓީ "ދަ ޑިމޮކްރެޓްސް" އުފެއްދުމުގެ މަސައްކަތް ފެށުމާއެކު، މަޖިލީހުގެ ނައިބު ރައީސްގެ މަޤާމުން އީވާ ވަކިކުރުމަށް ރައްޔިތުންގެ މަޖިލީހަށް ހުށަހެޅީ މިދިޔަ މަހުގެ 23 ވަނަ ދުވަހުއެވެ. އީވާ މަޤާމުން ވަކިކުރުމުގެ މައްސަލައިގައި އެމްޑީޕީގެ 50 މެންބަރުން ސޮއިކުރެއްވިއެވެ.
އެމްޑީޕީގެ ޕާލިމެންޓްރީ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ސޮއި ކުރައްވައި، މަޖިލީހުގެ އަމީންއާންމު ފާތިމަތު ނިއުޝާއަށް ރޭ ފޮނުއްވި ސިޓީގައި ވިދާޅުވީ، އީވާގެ އިތުބާރު ނެތްކަމުގެ މައްސަލަ އެޖެންޑާކުރުން އިސްތިސްނާ ކުރެވޭ އެއްވެސް ޙާލަތެއް މަޖިލީހުގެ ގަވާއިދުގައި ބަޔާންކޮށްފައިނުވާ ކަމަށެވެ.
އަދކ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ލިބުމުން އެ ޤަރާރު ލިބޭތާ މަދުވެގެން ތިން ދުވަސް ތެރޭގައި، އެ ޤަރާރުގެ ނޯޓިސް ދޭ ދުވަހުން ފެށިގެން 14 ދުވަހަށްފަހު ބާއްވާ ޖަލްސާއަށް ޤަރާރު ހުށަހަޅަންޖެހޭ ކަމަށް ވެސް އަސްލަމްގެ ސިޓީގައިވެއެވެ.
އީވާގެ އިތުބާރު ނެތްކަމުގެ މައްސަލަ އެޖެންޑާކުރުމަށްފަހު މައްސަލަ ނެގީ މަޖިލީހުގެ ކޮމިޓީތައް އަލުން އެކުލަވާލުމުގެ މަސައްކަތް ނުނިމޭކަން ފާހަގަކޮށެވެ.
Ads by STO
