އީވާގެ އިތުބާރު ނެތްކަމުގެ މައްސަލަ މާދަމާއަށް އެޖެންޑާ ކޮށްފި
ރައްޔިތުންގެ މަޖިލީހުގެ ނައިބު ރައީސް އީވާގެ އިތުބާރު ނެތް ކަމުގެ މައްސަލަ އެޖެންޑާ ނުކުރެވި ދިގު ދެމުމަށް ފަހު، މާދަމާ އޮންނަ މަޖިލީހުގެ ޖަލްސާއަށް އެޖެންޑާ ކޮށްފިއެވެ.
އެމްޑީޕީގެ މެންބަރުކަމުން ވަކިވުމާ ގުޅިގެން އީވާގެ އިތުބާރު ނެތް ކަމުގެ މައްސަލައެއް ހުށަހެޅީ އެ ޕާޓީންނެވެ.
އީވާގެ އިތުބާރު ނެތް ކަމުގެ މައްސަލައިގައި ފޮނުވި ނޯޓިސް މި މަހުގެ 11 ވަނަ ދުވަހަށް ވަނީ ހަމަވެފައެވެ. ނަމަވެސް، އެ މައްސަލަ ކުރިއަށް ގެންދާނެ ގޮތަކާ ގުޅޭ ގޮތުން އާންމު ކޮމިޓީން ނިންމަން ޖެހޭ ނިންމުންތައް ނިންމާފައިނުވާތީ، އެ މައްސަލަ އެޖެންޑާއެއް ނުކުރެއެވެ.
އަމީންއާންމު ސޮއިކުރައްވާ މިއަދު ފޮނުވި ސިޓީއެއްގައި ވިދާޅުވެފައިވަނީ އެ މައްސަލައިގައި ބަހުސް ކުރާނެ ވަގުތު މަޖިލީހުގެ ޤަވާއިދުގެ 206 ވަނަ މާއްދާއަށް ރިޢާޔަތްކޮށް އެ 205 ވަނަ މާއްދާގެ ކ ގެ ދަށުން ކަނޑައެޅިފައިނުވި ނަމަވެސް އެ މާއްދާގެ ނ ގައިވާ ގޮތުގެ މަތިން އެންމެ އަވަހަށް އަންނަ ރަސްމީ ބަންދުނޫން ދުވަހަކު ބާއްވާ ޖަލްސާއަށް އެ ގަރާރު އެޖެންޑާ ކުރަން ޖެހޭ ކަމަށެވެ.
އެހެންވެ، މާދަމާ އޮންނަ މަޖިލީހުގެ ޖަލްސާއަށް އެ މައްސަލަ އެޖެންޑާ ކޮށްފައިވާ ކަމަށް އެ ސިޓީގައި ވަނީ ބުނެފައެވެ.
"އެންމެ އަވަހަށް އަންނަ ރަސްމީ ބަންދުނޫން ދުވަހަކު ބާއްވާ ޖަލްސާއަށް އެ ގަރާރު ހުށަހަޅަން ވާނެ ކަމަށް ބަޔާން ކޮށްފައިވާތީ، މާދަމާ ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއަށް އެ ގަރާރު އެޖެންޑާ ކުރެވޭނެ ވާހަކަ ދަންނަވަމެވެ." ސިޓީގައި ވެއެވެ.
(ތަފްސީލު އަންނަނީ)
Ads by STO
