ވެރިކަން ލިބިއްޖެނަމަ ރާއްޖޭގެ ހުރިހާ ސަރަހައްދެއް ބަލަހައްޓީ ދިވެހި ސިފައިން: އެމްއެންޕީ
އެމްއެންޕީގެ ރިޔާސީ ކެނޑިޑޭޓް ދަނގެތީ ދާއިރާގެ މެންބަރު މުހައްމަދު ނާޒިމްގެ ވެރިކަމުގައި އަސްކަރިއްޔާގެ ޤާބިލްކަން އިތުރުކޮށް ހަރުދަނާކުރާނެކަމަށް އެޕާޓީގެ ނައިބު ރައީސް އަބްދުﷲ ރިޔާޒް ވިދާޅުވެއްޖެއެވެ.
އެމްއެންޕީން ރިޔާސީ އޮންތިހާބަށް ތައްޔާރުވަމުން އަންނައިރު އެޕާޓީން ވަނީ ރިޔާސީ އިންތިހާބަށް މެނިފެސްޓޯވެސް އެކުލަވާލާ ލޯންޗްކޮށްފައެވެ.
އަބްދުﷲ ރިޔާޒް ކުރެއްވި ޓްވީޓެއްގައި ވިދާޅުވީ ނާޒިމުގެ ވެރިކަމެއްގަ ދިވެހިރާއްޖޭގެ އެއްގަމާ، ކަނޑާ ވައިގެ ސަރަހައްދު ބަލަހައްޓާނީ ދިވެހިއަސްކަރިއްޔާއިން ކަމަށެވެ.
"ދިވެހި އަސްކަރިއްޔާގެ ޤާބިލްކަން އިތުރުކޮށް ހަރުދަނާކުރާނެ. މާލީ، އިޤްތިސޯދީ އަދި ސަލާމަތީ ކަންކަމުގަ އެއްގައުމަކަށް ބަރޯސާވެގެންއޮތްއޮތުން ނިމުމަކަށް ގެންނާނެ." ރިޔާޒް ވިދާޅުވިއެވެ.
"އުޖާލާ ޒަމާން"ގެ ނަމުން އެމްއެންޕީގެ މެނިފެސްޓޯއަށް ނަންދީފައިވާއިރު އެމްއެންޕީން އަންނަނީ ނާޒިމްގެ ކެމްޕޭން ހަރަކާތްތައްވެސް ކުރިއަށްގެންދަމުންނެވެ.
