ރިޔާސީ އިންތިހާބުގައި ވާދަކުރައްވާނެކަމަކަށް ރައީސް ނަޝީދު ވިދާޅެއް ނުވި
އަންނަ ސެޕްޓެމްބަރު މަހު ބޭއްވުމަށް ތައްޔާރުވަމުންދާ ރިޔާސީ އިންތިހާބުގެ ވޯޓު ކަރުދާސްކޮޅުގައި ނަން އޮންނާނެކަމަށް، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވާން ދެކޮޅު ހައްދަވައިފި އެވެ.
ރައްޔިތުންގެ މަޖިލީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި އަންނަ ރިޔާސީ އިންތިހާބުގައި ރައީސް ނަޝީދު ވާދަކުރައްވާނެތޯ ނޫސްވެރިއަކު ސުވާލު ދެންނެވި އެވެ. ސުވާލުގެ ޖަވާބު ދެއްވަން އެމަނިކުފާނު ފެއްޓެވީ ތަންކޮޅެއް ދުރުންނެވެ.
"ވެރިކަމުގެ ދަހިވެތިކަމުގަ އެވަރަށް އުޅުއްވާކަށް ނުވާނެ އެއްވެސް ބޭފުޅެއް. އަބަދު އަބަދު އަބަދު ދެވަނަ ދައުރެއް ހޯއްދެވުމަށް މިދައުރަށް އިންތިހާބުވުމަށް، އަޅުގަނޑު ރައީސްކަންވެސް ކޮށްފިން ރާއްޖޭގަ. އެއީކީއެއް ނޫން ޝައުގުވެރިވާ ކަމަކީ" ރައީސް ނަޝީދު ވިދާޅުވި އެވެ.
އެމަނިކުފާނު ވިދާޅުވީ ޝައުގުވެރިވެވަޑައިގަންނަވަނީ ރާއްޖޭގެ ރައްޔިތުންނަށް އިންސާފު ލިބުމާއި ތަނަވަސްކަން ލިބުމާއިއެކު ހާސްކަމެއްގައި ދިރިއުޅެން ނުޖެހޭނެ ގޮތްތަކެއް ހޯދައިދިނުމަށް ކަމަށެވެ. ރައީސް އިބްރާހިމް މުހައްމަދު ޞާލިހަށް އިޝާރާތް ކުރައްވައި ރައީސް ނަޝީދު ވިދާޅުވީ ބައެއް ބޭފުޅުން ތަކުރާރުކޮށް މިވާހަކަ ދައްކަވާ އަޑު އިވިވަޑައިގަންނަވާ ކަމަށެވެ.
އަބަދު ވެރިކަމުގެ އަރާމާއި ލައްޒަތުގެ ތެރޭގައި އުޅޭ ވާހަކަ ދައްކަމުން ދާން ނުޖެހޭ ކަމަށާއި ދެވަނަ ދައުރެއްގެ ވާހަކަ އަބަދު ދައްކަން ނުޖެހޭކަމަށް ރައީސް ނަޝީދު ވިދާޅުވި އެވެ. މިކަމާއި ކަންބޮޑުވާކަން ފާހަގަކުރައްވައި ރައީސް ނަޝީދު ވިދާޅުވީ ވެރިކަމުގެ ދަހިވެތިކަމުގައި އެއްވެސް ބޭފުޅަކު ނޫޅުއްވުމަށް އެދިވަޑައިގަންނަވާ ކަމަށެވެ.
ރިޔާސީ އިންތިހާބުގައި ވާދަކުރައްވާނެތޯ ކުރެވުނު ސުވާލަށް ރައީސް ނަޝީދު ސީދާ ޖަވާބެއް އަރުވާފައި ނުވާތީ އެހެން ނޫސްވެރިޔަކު ސުވާލު ތަކުރާރު ކުރެއްވި އެވެ. ދެންވެސް ސީދާ ޖަވާބެއް އެމަނިކުފާނު ނުދެއްވަ އެވެ.
"ޖަލުގަ ނެތިއްޔާ ކޮންމެ ބޭފުޅެއްގެ، ތިބޭފުޅާގެ ނަންވެސް ބޭއްވޭނެ ކަރުދާސްކޮޅުގަ. ކޮންމެ ބޭފުޅަކަށްވެސް ކަރުދާސްކޮޅުގަ ނަން ޖެއްސެވޭނެ" ރައީސް ނަޝީދު ވިދާޅުވި އެވެ.
ރައީސް ނަޝީދު ރައީސްކަން ކުރައްވާ އެމްޑީޕީގެ ރިޔާސީ ކެނޑިޑޭޓަކީ ރައީސް ޞާލިހެވެ. އެހެންވެ ރައީސް ނަޝީދު ރިޔާސީ އިންތިހާބުގައި ވާދަކުރެއްވުމަށް ދަ ޑިމޮކްރެޓްސްގެ ނަމުގައި ޕާޓީއެއް އުފައްދަން މަސައްކަތް ކުރައްވާކަމުގެ އަޑުތަކެއް ވަނީ ފެތުރިފަ އެވެ. ޑިމޮކްރެޓްސް އުފެއްދުމަށް އިލެކްޝަންސް ކޮމިޝަނަށް ހުށަހަޅާފައިވީ ނަމަވެސް ފުރަތަމަ 3،000 މެމްބަރުންގެ ތެރޭގައި ރައީސް ނަޝީދުގެ ނަންފުޅެއް ނެތެވެ. ރައީސް ނަޝީދު އަދިވެސް ހުންނެވީ އެމްޑީޕީގެ ރައީސްގެ މަގާމުގަ އެވެ.
