ސުޕްރީމް ކޯޓަށްވެސް ދާނަން، މިބަލަނީ ނުގޮސް މަޖިލިސް ހުޅުވޭތޯ: އަސްލަމް
ރައްޔިތުންގެ މަޖިލީހުގެ މަސައްކަތްތައް ހުއްޓިފައި އޮތް މައްސަލައިގައި ސުޕްރީމް ކޯޓަށް ދާން ޖެހިއްޖެ ހާލަތެއްގައި އެމްޑީޕީން އެކަންވެސް ކުރާނެ ކަމަށާއި އެހެންނަމަވެސް މަސައްކަތް ކުރަނީ އެހިސާބަށް ކަންކަން ނުގެންގޮސް މަޖިލިސް ހުޅުވޭތޯކަމަށް އެމްޑީޕީ ޕީޖީ ގްރޫޕުގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
މިއަދު އެމްޑީޕީ ޕީޖީ ގްރޫޕުގެ ފަރާތުން ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ މައްސަލަ އެއްކޮށް ހުށަހަޅައިގެން މަޖިލިސް ހުއްޓުމަކަށް އަންނަންޖެހޭނެ އެއްވެސް ސަބަބެއް ނެތްކަމަށެވެ.
ރައީސް ނަޝީދު ގޮތް ދޫކުރައްވާފައި މަޖިލީހަށް ވަޑައިގެން ނައިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންގޮސްދެއްވުމުން މައްސަލަ ހައްލުވީކަން ފާހަގަކުރައްވައި އަސްލަމް ވިދާޅުވީ ދައުލަތުގެ އެއް ބާރުގެ ވެރިއަކަށް ހުންނަވާ ބޭފުޅަކު ތިމަންނާ މަގާމުގެ މަސްއޫލިއްޔަތު އަދާކުރައްވާނީ މިވެނިކަމެއް މިގޮތަށް ކުރީމައޭ ވިދާޅުވުމަކީ ވަރަށް "ދެރަވަރު" ވާހަކައެއް ކަމަށެވެ.
ރައީސް ނަޝީދު އެދިވަޑައިގަންނަވަނީ ކޮންމެވެސް އެއް މައްސަލައެއް އެމްޑީޕީން އަނބުރާ ގެންދާށެވެ. އެހެންނަމަވެސް އަސްލަމް މިއަދު ދެއްކެވި ވާހަކަފުޅުން އެފަދަ ވިސްނުމެއް އެމްޑީޕީގެ ނެތްކަން ސާފުވެއެވެ. ސިޔާސީ ކަންކަން ކުރާއިރު ކޮމްޕްރޮމައިޒް ކުރުމަކީ އާންމު ކަމެއްކަމަށާއި އެއްމައްސަލަ އަނބުރާ ނުގެންދިޔުމަށް އެމްޑީޕީއަށް އޮތް ހުއްޖަތަކީ ކޮބައިތޯ ނޫސްވެރިން ސުވާލު ދެންނެވުމުންވެސް އަސްލަމް ވިދާޅުވީ އެކަމާއިމެދު ޕީޖީ ގްރޫޕުގައި މަޝްވަރާ ނުކުރެވޭ ކަމަށެވެ.
އަސްލަމް ވިދާޅުވީ މައްސަލަ ހައްލުކުރަން އޮޕްޝަންސްތަކެއް އެބަ ހުރިކަމަށެވެ. އެގޮތުން ސުޕްރީމް ކޯޓަށް ދިޔުމަކީ އެއް އޮޕްޝަންކަމަށް އޭނާ ވިދާޅުވިއެވެ.
"އަޅުގަނޑުމެންގެ ލާސްޓް ރިސޯޓަކީ ސުޕްރީމް ކޯޓަށް ދިޔުން. އެހެންނަމަވެސް އަޅުގަނޑުމެން ވަރަށް މަސައްކަތް ކުރާނަން މިއީ ދައުލަތުގެ އެއް ބާރަށް ވެފައި މިތަނުން މިތަނުގެ ކަންކަން ހަމަޖެއްސޭނެ މަގެއް ފެނޭތޯ އަޅުގަނޑުމެން ބަލާނަން" އަސްލަމް ވިދާޅުވިއެވެ.
އެހެންނަމަވެސް މައްސަލަ ހައްލު ނުވެ ގިނަ ދުވަހަށް ދެމިގެން ދާނަމަ ދައުލަތުގެ ކޮންމެވެސް އެއް ބާރަކުން މިމައްސަލަ ހައްލު ކުރުމަށް އެހީތެރިކަން ހޯދާނެ ކަމަށް އަސްލަމް ވިދާޅުވިއެވެ.
މީގެ އިތުރުން އަސްލަމް ވަނީ މަޖިލިސް ހުޅުވަން ޖެހޭނެ ކަމަށާއި ރިޔާސަތު ބަލަހައްޓަވަން އުޒުރުވެރިވާނަމަ ރައީސް ނަޝީދާއި ނައިބު ރައީސް އީވާ ވެސް އިސްތިއުފާ ދެއްވަން އެދިވަޑައިގަންނަވާ ކަމަށެވެ.
ތިޔައީ އިބޫ ހަދައިގެން އުޅޭ އެއްޗެއް
އާތް ތެރީ…
ބަލަންތިބެނީ ކޯންޗެއް .މިކަން ހައްލުކުރުމަށް ސިޔާސީ ޕަޓީ ތަކުންވެސް ކޯޓަށް ހުށަހެޅޭނެ. ގާނޫނުއަސަސީގެ 82 ވަނަ މާއްދާގެ ށ ތަންފީޒު ނުވެ ވަކިމީހެއްގެ ބާރު ދަށުގަ މަޖިލިސް އޮންނަގޮތަށް ހަދާފައިވާ ގަވާއިދަލީ ބާތިލް ގަވާއިދެއްކަން ގާނޫނުއަސަސީގެ 144 ވަނަ މާއްދާ ބެލުމުން އެގޭ . ވީމާ ކޯޓަށް ގޮސް މަޖިލީހުގެ ގަވާއިދުގެ އެބައިބާތިލްކޮށް މަޖިލީހުގެ ޖަލްސާބާއްވާ ގަވާއިދު އިސްލާހުކުރޭ. ގާނޫނުއަސާސީގެ 144 ވަނަ މާއްދާގަ ބުނާގޮތުންގާނޫނުއަސަސީއާއި ތައާރަޒްވާމިންވަރެއް ބާތިލް ކުރުމުގެ ބާރު ކޯޓްތަކަށް ލިބިގެންވޭ.