ސިފައިންގެ ފްލެޓްތަކަށް އަންނަ މަހު ވަދެވޭނެ: މާރިޔާ
ސިފައިންނަށް ޚާއްސަކޮށްގެން، ހުޅުމާލޭގައި އަޅާ ފްލެޓްތަކަށް އަންނަ މަހުގައި ވަދެވޭނެ ކަމަށް ޑިފެންސް މިނިސްޓަރު، މާރިޔާ އަޙްމަދު ދީދީ ވިދާޅުވެއްޖެއެވެ.
މާރިޔާ މިހެން ވިދާޅުވީ، ސިފައިންގެ 131 ވަނަ އަހަރީ ޖަލްސާގައި ދެއްކެވި ވާހަކައިގައެވެ. މިނިސްޓަރު ވިދާޅުވީ، ސިފްކޯ ހިޔާ ފްލެޓްތައް މި ވެރިކަން އައިއިރު އޮތީ ކޮންކްރީޓް ސްޓްރަކްޗަރއެއްހެން ކަމަށާއި، އެތަންތަނަށް އަންނަ މަހު ވަދެވޭވަރު ވާނެ ކަމަށް ސިފްކޯއިން މަޢުލޫމާތުދޭ ކަމަށެވެ.
މި މަޝްރޫޢު ނިމެނީ، ރައީސް އިބްރާހީމް މުޙައްމަދު ޞާލިޙު އެކަމަށް ދެއްވާ އަހަންމިއްޔަތުގެ ސަބަބުން ކަމަށް ވެސް މިނިސްޓަރ ވިދާޅުވިއެވެ.
ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށްޓަކައި "ސިފްކޯހިޔާ" ގެ ނަމުގައި 330 ފްލެޓުގެ ޢަމަލީ މަސައްކަތް ފަށާފައިވަނީ 2013 ވަނަ އަހަރުގެ ސެޕްޓެމްބަރު މަހުގެ 02 ވަނަ ދުވަހުއެވެ.
އެ މަސައްކަތް ޑިފެންސް މިނިސްޓްރީން އޭރު ހަވާލުކުރީ ނޫމަޑި ރިސޯޓު އެންޑް ރެޒިޑެންސްއާއެވެ. ނަމަވެސް އެއްބަސްވުމާ އެއްގޮތަށް މަސައްކަތް ނުކުރާތީ މަޝްރޫޢު ފަހުން ހަވާލު ކުރީ އައިލެންޑް އެކްސްޕާޓް އާއެވެ.
