ގަވާއިދުން މަޖިލިސް ކުރިއަށް ގެންދާނަމަ ރިޔާސަތާއެކު މަޝްވަރާ ކުރެވިދާނެ: އެމްޑީޕީ
މަޖިލީހުގެ ޖަލްސާތައް ގަވާއިދާއި އެއްގޮތަށް ކުރިއަށް ގެންދާނަމަ އެމްޑީޕީން ހުށަހަޅާފައިވާ އިތުބާރު ނެތްކަމުގެ ދެ މައްސަލައިގެ ތެރެއިން އެއް މައްސަލަ އަނބުރާ ގެންދިއުމުގެ މަޝްވަރާތައް ކުރިއަަށް ގެންދެވިދާނެކަމަށް އެމްޑީޕީ ޕީޖީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެ އެވެ.
50 މެމްބަރުންގެ ސޮޔާއިއެކު ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލައެއް މަޖިލީހަށް ވަނީ ވައްދައިފަ އެވެ. އަދި އޭގެ ފަހުން 54 މެމްބަރުންގެ ސޮޔާއިއެކު ރައީސް މުހައްމަދު ނަޝީދުގެ މައްސަލައެއްވެސް ވަނީ ވައްދައިފަ އެވެ. މައްސަލަތައް ވެއްދުމާއިއެކު އެ ދެބޭފުޅުންވެސް ވަނީ ރިޔާސަތުގައި އިންނަވަން އުޒުރުވެރިވެވަޑައިގެންފަ އެވެ. އެއާއިއެކު ދެ މައްސަލަ ކުރިއަށް ގެންދެވޭނެ ގޮތެއް އޮތީ ނުފެނި އެވެ.
މިދިޔަ ދެ ހަފްތާއެއްހާ ދުވަހުގެ ތެރޭގައި މަޖިލީހުގެ ޖަލްސާތައް ކުރިއަކަށް ނުގެންދެވެ އެވެ. ހުރިހާ މަސައްކަތެއް ހުއްޓިފައި އޮއްވައި ދައުރު ނިންމާލައި މަޖިލިސް ވަނީ ޗުއްޓީއަށް ގޮސްފަ އެވެ. އެހެންނަމަވެސް މިއަދު ވަނީ ދައުރުން ބޭރުން އަނެއްކާވެސް ޖަލްސާއެއް ބާއްވައިފަ އެވެ. އެޖަލްސާވެސް މާގިނަ އިރުތަކެއް ނުވެ ނިންމައިލީ އެއްވެސް މަސައްކަތެއް ނުކޮށެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އަސްލަމް ވިދާޅުވީ އިތުބާރު ނެތްކަމުގެ އެއްވެސް މައްސަލައެއް އަނބުރާ ގެންދިޔުމުގެ ވިސްނުމެއް ނެތްކަމަށެވެ. އެއީ މިއިން ކޮންމެ މައްސަލައެއްވެސް ހުށަހަޅާފައިވަނީ ގިނަ މެމްބަރުތަކެއްގެ ސޮޔާއިއެކު ކަމަށް ވާތީކަމަށް އަސްލަމް ވިދާޅުވި އެވެ.
އެހެންނަމަވެސް އޭނާ ވިދާޅުވީ މަޖިލީހުގެ ޖަލްސާތައް ގަވާއިދުން ކުރިއަށް ގެންދާނަމަ ކޮންމެވެސް އެއް މައްސަލައެއް އަނބުރާ ގެންދިޔުމާއި ގުޅޭ މަޝްވަރާތައް ކުރެވުނީސްކަމަށެވެ.
"މިސާލަކަށް މައްސަލައެއް ނެގުމާ ދޭތެރޭގައި ވެސް ވިސްނަން ވެސް ޖާގައެއް ލިބިދާނެ ފުރިހަމައަށް، އަދިވެސް މިސާލަކަށް މަޖިލިސް ގެންދަވާ ނަމަ ވެސް،" އަސްލަމް ވިދާޅުވި އެވެ.
އަސްލަމް މިފަދައިން ވިދާޅުވިނަމަވެސް އެމްޑީޕީ ޕީޖީ ގްރޫޕުގައި އެފަދަ މަޝްވަރާއެއް ކުރިއަކަށް ނުދެ އެވެ. އަސްލަމް ވިދާޅުވީ މަޖިލީހުގެ ގަވާއިދާއި މުޅިން ހިލާފަށް ރިޔާސަތުން ކަންކަން ކުރަމުން ދަނީ ރައީސާއި ނައިބުރައީސް މަގާމުން އިސްތިއުފާ ދެއްވަން ބޭނުންފުޅު ނުވާތީ ކަމަށެވެ.
މަޖިލިހުގައި އެޅުވިފައިވާ މަރުތަޅު ނެއްޓުވުމަށް ކުރަންޖެހޭ ހުރިހާކަމެއް ކުރައްވާނެކަމަށާއި ސުޕްރީމް ކޯޓަށް ދިޔުމަކީ އެންމެ ފަހުގެ މަރުހަލާކަމަށް މީގެ ކުރިން ވިދާޅުވި ވާހަކަ އަސްލަމް މިއަދުވެސް ތަކުރާރު ކުރެއްވި އެވެ. ވިދާޅުވީ ސުޕްރީމް ކޯޓަށް ދިޔުމުގެ ކުރިން އަދިވެސް ގިނަ މަސައްކަތްތަކެއް ކުރެވެން އެބަހުރި ކަމަށެވެ.
