ރައީސް ޔާމީންގެ ކެމްޕެއިން ހަތަރު އަތޮޅެއްގައި ފަށައިފި
އިދިކޮޅު ޕްރޮގްރެސިވް ކޮންގުރެސް ކޯލިޝަނުގެ ރިޔާސީ ކެނޑިޑޭޓު ރައީސް ޢަބްދުﷲ ޔާމީން ޢަބްދުލްޤައްޔޫމުގެ ރިޔާސީ ކެމްޕެއިން ހަތަރު އަތޮޅެއްގައި މިއަދު ފަށައިފިއެވެ.
އަތޮޅު ތެރެއިން ރައީސް ޔާމީނުގެ ކެމްޕެއިން ރަސްމީކޮށް ފުރަތަމަ ފަށާނީ ނ، ރ، ބ، އަދި ޅ އަތޮޅުގައެވެ.
އަންނަ ސެޕްޓެމްބަރު މަހު އޮންނަ ރިޔާސީ އިންތިހާބަށް ރައީސް ޔާމީންގެ ކެމްޕެއިންގެ އަމަލީ މަސައްކަތް ރަސްމީކޮށް ފެށީ މިދިޔަ ހޯމަ ދުވަހުއެވެ.
ރައީސް ޔާމީންގެ ކެމްޕެއިން ހަރަކާތްތައް ފަށާފައިވަނީ މާލޭގައި ދޮރުން ދޮރަށް ހިނގުމުގެ ހަރަކާތަކުންނެވެ. މި ހަރަކާތުގައި ޕީޕީއެމްގެ އިސް ބޭފުޅުން ވަނީ ބައިވެރިވެފައެވެ.
ރައީސް ޔާމީންގެ ކެމްޕޭން ސްލޯގަން އަކީ "ދިވެހީންގެރާއްޖެ”އެވެ.
"ދިވެހިންގެ ރާއްޖެ" އެ ޝިޔާރުން ދޭހަކޮށްދެނީ ދިވެހިންގެ އެއްބައިވަންތަ ކަމާއި ގައުމުގެ އިސްތިގްލާލާއި މިނިވަންކަން ކަމަށް އިދިކޮޅުން ބުނެއެވެ.
މިއަހަރު ބާއްވާ ރިޔާސީ އިންތިހާބުގައި ވާދަކުރާނެކަން މިހާތަނަށް ރަސްމީކޮށް 4 ޕާޓީއަކުން ވަނީ އިއުލާނުކޮށްފައެވެ. އިލެކްޝަން ކޮމިޝަނުން ބުނިގޮތުގައި އިންތިހާބަށް ކުރިމަތިލާން ހުޅުވާލާނީ ޖުލައި މަހުގެ 23 ވަނަ ދުވަހުއެވެ.
ރިޔާސީ އިންތިހާބު އޮންނާނީ 9 ސެޕްޓެމްބަރުގައެވެ. ދެ ވަނަ ބުރަކަށް ދާން ޖެހިއްޖެ ނަމަ، އެ އިންތިހާބު އޮންނާނީ 30 ސެޕްޓެމްބަރުގައެވެ.
